«Վերջին օրերի զարգացումները ցույց տվեցին, որ պատերազմի ավարտից ամիսներ անց, անգամ այն պարագայում, երբ կապիտուլյանտի միանձնյա որոշումով հակառակորդին են հանձնվել Արցախի բազմաթիվ գյուղեր և քաղաքներ, բայց հայկական պետությունները, միևնույն է, շարունակում են տարածքային կորուստներ կրել»,- «Պատիվ ունեմ» դաշինքի կողմից անցկացվող «ՀՀ և Արցախի անվտանգության միջավայրը հետպատերազմական ժամանակաշրջանում» թեմայով քննարկման ժամանակ փաստեց «Պատիվ ունեմ» դաշինքն ղեկավար Արթուր Վանեցյանը:
Նա շեշտեց՝ երեք օր առաջ էլ տեղեկացանք, որ, իր բնորոշմամբ, ինչ-որ քաղաքական թիմ պատրաստվում է Ադրբեջանի հետ կնքվելիք տարբեր պայմանագրերի ու համաձայնությունների միջոցով իրավական ուժ տալ բոլոր այն կորուստներին, որ ունեցել ենք անցած մի քանի ամիսների ընթացքում: Նա ահազանգեց՝ պահն իսկապես օրհասական է ու պարզաբանեց. «Վտանգ է սպառնում ոչ միայն ՀՀ սահմանային բնակավայրերին, այլև պետության գոյությանն ընդհանրապես: Հակառակորդը զգացել է տարածաշրջանային գործընթացները իր ծրագրերին և տնտեսական շահերին համահունչ ուղղելու հնարավորությունը: Իսկ ի՞նչ է հակադրում Հայաստանը Ալիևի և Էրդողանի մտադրություններին: Ոչինչ: Փոքրիկ, բառի բուն իմաստով, կարճատև ու երկրին որևէ բան չտվող, բացառապես Փաշինյանի նեղ անձնական շահերին ծառայող դիվիդենտների փոխարեն մեր պետությունն այսօր թշնամուն է հանձնում վաղը սեփական ճակատագիրը տնօրինելու վերջին հնարավորությունները: Մենք բոլորս հասկանում ենք, որ վաղը Նիկոլն այլևս չի լինելու երկրի ղեկին. շուտով նա կհեռացվի, և երկրի առաջ ծառացած մահացու այս մարտահրավերների բեռը կմնա մեր ժողովրդի ուսերին»:
Ուստի Արթուր Վանեցյանը պարզաբանեց՝ այս հարցերի համար համակարգային լուծումներ գտնելու ակնկալիքով էլ այսօր նախաձեռնել են այս քննարկումը: Դրա մի հատվածը կանցկացվի նաև փակ ռեժիմով: Արթուր Վանեցյանը նաև արձանագրեց՝ անցած պատերազմը և դրան հետևող զարգացումներն ամբողջովին փոխել են թե′ մեր անվտանգային միջավայրը, թե′ այն խնդիրների ու ծրագրերի բովանդակությունը, որոնք կոչված էին լուծել հայկական պետականությունների խնդիրները: Նա փաստեց՝ փոխվել է նաև մեր տարածաշրջանի աշխարհաքաղաքականությունը:
Արթուր Վանեցյանը վստահեցրեց՝ պետք է ոչ թե նախկինում գոյություն ունեցող անվտանգային համակարգերը վերականգնելու, այլ լիովին նորերը ստեղծելու ուղղությամբ մտածել:
Կարդացեք նաև
Տաթև ՀԱՐՈՒԹՅՈՒՆՅԱՆ
