«Հասարակությունը չի լիազորել, որ առանց իր իմացության՝ թուղթ ստորագրվի, անգամ եթե այն աշխարհի իդեալական փաստաթուղթն է»,- «Մեդիա կենտրոնի» կազմակերպած՝ «Հայաստանի սահմանազատում՝ վստահության ճգնաժամի պայմաններում» խորագրով քննարկման ժամանակ այսօր հայտարարեց «Համայնքային համախմբման եւ աջակցության կենտրոն» ՀԿ նախագահ, իրավապաշտպան Օլեգ Դուլգարյանը:
«Այն, ինչ իրականացվում է ժողովրդից, քաղաքացիական հասարակությունից գաղտնի, սխալ է ի սկզբանե եւ ունի միտում, որ մարդը միանձնյա որոշում է կայացնում։ Մյուս կողմից, սկսում ես մտածել, որ դա պարտադրում են մեր կառավարությանը։ Ժողովուրդը չի կարող անընդհատ նման սթրեսների ենթարկվել»,-նշեց Օլեգ Դուլգարյանը։
Հիշեցնենք՝ վարչապետի պաշտոնակատար Նիկոլ Փաշինյանը երեկ ԱԺ-ում քննարկումների ժամանակ հայտարարեց, որ պատրաստվում է ստորագրել ՀՀ-ի եւ Ադրբեջանի միջեւ սահմանազատման հանձնաժողով ստեղծելու մասին փաստաթուղթը։ Օլեգ Դուլգարյանի խոսքով. «Մարդկանց մոտ տպավորություն է, որ «բարդակ» է, եւ նման պայմաններում երկիրը ցնցումներից հետ պահելը դժվար է։ Ի՞նչ սահմանազատման մասին կարող է խոսք լինել, երբ ադրբեջանական կողմն ի սկզբանե գալիս է կեղծ քարտեզներով։ Իրենք դրանցով են գնալու սահմանազատման, ուստի սա սահմանազատման ամենավտանգավոր պահն է։ Եթե չես առաջնորդվում այդ կեղծ քարտեզներով, բնականաբար, ընդհարում է լինելու։ Ի՞նչ պայմաններով ենք գնալու սահմանազատման, այն քարտեզներով, որոնցով եկել-նստել են մեր հողի վրա՞»։
Կարդացեք նաև
Լուիզա ՍՈՒՔԻԱՍՅԱՆ
