Արցախյան երկու պատերազմների արդյունքում բռնի տեղահանված անձինք և այլ ակտիվիստներ այսօր Հայաստանում ՌԴ դեսպանատան դիմաց բողոքի ցույց էին կազմակերպել: Իրենց ձեռքերում քաղաքացիները պահում էին փուչիկներ՝ ՀԱՊԿ գրառմամբ:
«Այն, որ ՀԱՊԿ-ը վաղուց է փուչիկ, մենք խոսել ենք: ՀԱՊԿ-ը չի ծառայում իր կանոնադրական նպատակներին: Թուրքիան վաղուց է մխրճվել Ռուսաստանի կառավարական օղակներ, Ուզբեկստան, Ղրղզստան: ՀԱՊԿ-ն այլ կերպ կարելի է անվանել որպես ալյանս՝ Թուրքիայի շահերը սպասարկելու համար»,- հայտարարեց «Ադրբեջանական ԽՍՀ-ից փախստականների համագումարի» անդամ Մարիամ Ավագյանը, որն այլ ակտիվիստների հետ միասին մասնակցում էր ՌԴ դեսպանատան մոտ Արցախից բռնի տեղահանվածների բողոքի ցույցին:
Նա կարծիք հայտնեց, որ աբսուրդային է Թուրքիայի ներկայությունը Արցախում ստեղծված մոնիթորինգային խմբում, քանզի հենց Թուրքիան է եղել Հայոց ցեղասպանությունը ժխտած և 2020 թվականին կրկին ցեղասպանություն նախաձեռնած պետությունը:
Կարդացեք նաև
«Մինսկի խումբը և ԵԽԽՎ-ն պարտավոր են գործել Եվրոպական միության որդեգրած մարդու իրավունքների պաշտպանության մակարդակին համապատասխան: Մասնավորապես, նրանք պետք է վերականգնեն մինչև 2020 թվականի սեպտեմբերի 27-ը եղած ստատուս քվոն և անցնեն խաղաղ բանակցությունների»,- ասաց նա:
Այս նախաձեռնության հեղինակ Արմինե Խանյանը լրագրողների հետ զրույցում նշեց, որ մտահոգ է ՀԱՊԿ-ի խոսքերով, որոնք գործի չեն վերածվում: Նրա պնդմամբ, Սյունիքում կատարվածը ՀԱՊԿ-ի համար առաջին փորձությունն էր, որը ՀԱՊԿ-ը չի անցնում:
«Եթե դուք չկատարեք Հայաստանի առջև ձեր պարտավորությունները, ապա դուք ուղղակի փուչիկ եք»,- ասաց Արմինե Խանյանը:
Ցույցի ավարտին քաղաքացիները ՌԴ դեսպանատան դիմաց պայթեցրին ՀԱՊԿ գրառմամբ փուչիկները:
Նելլի ԳՐԻԳՈՐՅԱՆ
