«Ինչպե՞ս չհերքվեց, հերքվեց․․․ երեկ ընդդիմությունը տարածեց քննարկվող փաստաթղթի ամբողջական տարբերակը, որը ես հաստատում եմ, հաստատել է նաեւ վարչապետը։ Հաստատվել է նաեւ, որ դրան կից որեւէ փաստաթուղթ չկա, որեւէ գաղտնի կետ չկա։ Աշխատանքային տարբերակում ոչ մի խոսք չկա որեւէ տարածքային զիջման վերաբերյալ»,-խորհրդարանում լրագրողների հետ ճեպազրույցում այսօր հայտարարեց «Իմ քայլի» պատգամավոր, ԱԺ արտաքին հարաբերությունների հանձնաժողովի նախագահ Ռուբեն Ռուբինյանը՝ անդրադառնալով հարցադրմանը, որ վարչապետի պաշտոնակատար Նիկոլ Փաշինյանն այդպես էլ չհերքեց հայաստանյան մի քանի գյուղերն Ադրբեջանին հանձնելու մասին խոսակցությունները։
Հիշեցնենք, որ ԱԺ նիստում երեկ վարչապետի պաշտոնակատար Նիկոլ Փաշինյանը հայտարարեց, որ պատրաստվում է ստորագրել ՀՀ-ի եւ Ադրբեջանի միջեւ սահմանազատման հանձնաժողով ստեղծելու մասին փաստաթուղթը։
«Կրկնեմ՝ հայկական կողմն ասել է, որ այս փաստաթղթի քննարկումը կարող է տեղի ունենալ միայն ադրբեջանական զորքի՝ ելման դիրքեր վերադարձի դեպքում»,-շեշտեց Ռուբեն Ռուբինյանը։
Դառնալով գյուղերի վերադարձի խոսակցություններին, թե Նիկոլ Փաշինյանը բանավոր է պայմանավորվել Ադրբեջանին վերադարձնել մի քանի գյուղ, Ռուբինյանը պնդեց, որ դա սուտ է․ «Ոչ, դա քննարկման առարկա չի»։
Կարդացեք նաև
Ինչ վերաբերում է Փաշինյանի այն հայտարարությանը, որ կան սովետական Ադրբեջանին պատկանող տարածքներ, որոնք գտնվում են մեր վերահսկողության ներքո, եւ հակառակը, Ռուբինյանը նկատեց․ «Հնարավոր են տարբեր իրավիճակներ, բայց դելիմիտացիան եւ դեմարկացիան շատ երկար գործընթացներ են։ Փաստաթուղթն ամրագրում է, որ գործընթացը պետք է լինի բացառապես քաղաքական, դիվանագիտական ճանապարհով»։
Լրագրողները կրկին հարցրին՝ այսինքն, հնարավո՞ր է որոշ գյուղեր անցնեն Ադրբեջանին։ Ռուբինյանը պատասխանեց․ «Գաղտնիք չէ, որ խորհրդային Հայաստանն Ադրբեջանի կողմից շրջապատված անկլավ է ունեցել, եւ հակառակը։ Այս հարցերը կարող են հետագայում քննարկման թեմա դառնալ, կարող են չդառնալ։ Պետք չի ստանալ տպավորություն, որ եթե հանձնաժողովը ստեղծվի, ուրեմն դելիմիտացիա կլինի։ Ոչ, դա կնշանակի, որ ստեղծվեց հանձնաժողով»։
Լուիզա ՍՈՒՔԻԱՍՅԱՆ
