Այսօր «Լուսավոր Հայաստան» խմբակցությունը աղմկահարույց փաստաթղթի հետ կապված արտահերթ նիստ է հրավիրել: Նպատակն այն է, որ հրապարակվի միջազգային փաստաթուղթը եւ այն չստորագրեն՝ առանց ԱԺ-ի վավերացման:
Նիստի ժամանակ վարչապետի պաշտոնակատար Նիկոլ Փաշինյանի ելույթից հետո «Լուսավոր Հայաստան» խմբակցության քարտուղար Գեւորգ Գորգիսյանը հայտարարեց. «Չեմ հա-վա-տում: Որովհետեւ չտրվեցին հստակ պատասխաններ: 2 օր հարց է շրջանառվում՝ քննարկվո՞ւմ է Տավուշի գյուղերի փոխանակումը, հանձնումը: Դե…դեմարկացիա կլինի՝ կորոշենք: Իմքայլական պատգամավորներ, որ հիմա այդտեղ դեմքով ծամածռություններ եք անում, հասկանո՞ւմ եք, հանրությունը չի հավատում այս կիսատ-պռատ տեքստերին: 40 օր հանրությանը ասեցիք՝ հաղթում ենք: Այն ամենը, որ Փաշինյանն ասում էր՝ չեմ անելու՝ եղավ: Հիմա էլ, որ ասում է՝ չի լինելու, մարդիկ չբավարարվեցին: Մնացին հարցեր, որոնք շարունակելու են քայքայել մեր հանրությանը»:
Նա ասաց, որ Փաշինյանի ելույթը ոչ թե պատասխաններ տվեց, այլ նոր հարցեր առաջացրեց՝ հիմա մի անկլավը մյուսի հետ պատրաստվո՞ւմ են փոխել, թե՞ չեն պատրաստվում:
Պատգամավորը հորդորեց հստակ ասել՝ ի՞նչ գործընթացներ են գնում, սա ազդելո՞ւ է Արցախի հետագա կարգավիճակի վրա. «Հենց այս անիշխանության եւ քաոսի համար էինք ուզում շուտափույթ ընտրություններ…Քանի վարչապետն այստեղ ելույթ էր ունենում, Սյունիքի մարզպետը հայտարարեց, որ եւս 30 ադրբեջանցի Սեւ լճի հատվածում հատել են ՀՀ սահմանը, հիմա հերքո՞ւմ եք սա, թե՞ հաստատում: Չի կարելի ժողովուրդ այսպես, երկիր եք կործանում, մի հատ խելքներդ գլուխներդ հավաքեք»:
Կարդացեք նաև
Հռիփսիմե ՋԵԲԵՋՅԱՆ
