Մամուլում տեղեկություն էր տարածվել, որ Հայ կոմպոզիտորական արվեստի 12-րդ փառատոնի անցկացումը կասկածի տակ է՝ ԿԳՄՍ նախարարության մեղքով:Մասնավորապես, Հայաստանի պետական սիմֆոնիկ նվագախումբ» ՊՈԱԿ-ի տնօրեն Սարգիս Բալբանյանը նեղսրտել էր, որ տեսակով բացառիկ փառատոնը պետության ուշադրության ներքո չէ:
Ի պատասխան Aravot.am-ի հարցման ԿԳՄՍ նախարարությունից գրավոր հետեւյալը փոխանցեցին. «Ի պատասխան ս. թ. մայիսի 19-ի «Հայ կոմպոզիտորական արվեստի» 12-րդ փառատոնի կայացմանն ուղղված Ձեր հարցման՝ տեղեկացնում ենք, որ մշակութային միջոցառումները ընտրվում են դրամաշնորհային մրցույթի արդյունքում, և այդ ծրագրերը կարող են իրականանալ միայն համապատասխան պայմանագրերի առկայության դեպքում՝ կնքված ՀՀ ԿԳՄՍ նախարարության և տվյալ կազմակերպության միջև։
Նման պայմանագիր ՀՀ ԿԳՄՍ նախարարության և «Հայաստանի պետական սիմֆոնիկ նվագախումբ» ՊՈԱԿ-ի միջև չի կնքվել, ավելին՝ դրամաշնորհային մրցութային ծրագրում նշյալ ծրագիրը հանձնաժողովի կողմից չի հաստատվել։
Միևնույն ժամանակ ելնելով փառատոնին աջակցելու նպատակադրումից՝ «Հայ կոմպոզիտորական փառատոնին» հոբելյանական միջոցառումների աջակցման ծրագրից արդեն իսկ հատկացվել է 2․481․000 ՀՀ դրամ, այն հիմնավորմամբ, որ փառատոնի ծրագրում ընդգրկված են նաև կոմպոզիտորներ, որոնց հոբելյանը լրանում է 2021 թվականին։
Կարդացեք նաև
Որևէ ընթացակարգային կամ իրավական շեղում առկա չէ»:
Գոհար ՀԱԿՈԲՅԱՆ
