Սոցփաթեթի շահառու հանդիսացող աշխատողների սոցիալական կարիքների բավարարմանը, պետական մարմիններում աշխատանքի գրավչության բարձրացմանը, պետականից մասնավոր հատված կադրերի հոսունության կրճատմանն ուղղված նախաձեռնությունը քննարկվեց ԱԺ առողջապահության եւ սոցիալական հարցերի մշտական հանձնաժողովի մայիսի 20-ի նիստում: Կառավարությունը, փոփոխություն կատարելով «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» ՀՀ օրենքում, ընդլայնում է օրենքի շահառու անձանց տրամադրվող սոցփաթեթի ծառայությունների շրջանակը:
Հիմնական զեկուցող, ՀՀ աշխատանքի եւ սոցիալական հարցերի նախարարի տեղակալ Ռուբեն Սարգսյանի տեղեկացմամբ՝ սոցփաթեթի համար հատկացվող միջոցները շահառուները կարող են ուղղել նաե պետական սուբսիդավորմամբ ուսանողական վարկերի եւ մարզա-առողջարարական եւ սպորտային համալիրների, լողավազանների ու այլ սպորտային կազմակերպությունների ծառայություններից օգտվելու համար սահմանված վճարի մարմանը:
Նախագծի ընդունմամբ չի նախատեսվում բյուջեի ծախսերի ավելացում:
Նշվեց, որ առաջիկայում շահառուն իր սոցփաթեթի գումարը կկարողանա օգտագործել նաեւ ատամնաբուժական ծառայությունների համար եւ ուղղել վճարովի մանկապարտեզ հաճախող իր երեխայի վարձի մարմանը:
Կարդացեք նաև
Հանձնաժողովի նախագահ Նարեկ Զեյնալյանը, դրական գնահատելով նախաձեռնությունը, կարեւորեց սոցփաթեթի ծառայություններում նոր ուղղությունների ավելացումը. «Որքան շատ լինեն այս ուղղությունները, այնքան լայն հնարավորություններ կունենան շահառուները գումարը ծախսելու առումով, ինչը նաեւ դրական ազդեցություն կունենա տնտեսության վրա»:
Զեկուցողի խոսքով՝ Կառավարությունը նախատեսում է ընդլայնել շահառուների ցանկը. որպես երկրորդական շահառու կսահմանվի «Ընտանիքի անդամներ» հասկացությունը: Փոխնախարարն ընդգծեց, որ այս պահին շահառուների ցանկում ընդգրկված չեն բարձրաստիճան պաշտոն զբաղեցնող անձինք:
Նախագիծը ստացավ դրական եզրակացություն:
ԱԺ
