ԱԺ «Լուսավոր Հայաստան» կուսակցության պատգամավոր Աննա Կոստանյանը հրավիրված բանավեճում ելույթ ունենալուց առաջ արձանագրեց, «Իշխանության թեւից ներկայացուցիչ չկա: Ի սկզբանե կարող ենք ֆիքսել, որ բանավեճային ձեւաչափը չի ստացվելու, որովհետեւ առնվազն հակադրվող կողմը չկա եւ սկզբունքային տեսանկյունից մենք բոլորս այստեղ գրեթե նույն գաղափարին ենք»:
Պատասխանելով սահմանային ռիսկայնությանը, անձեռնմխելիությանը, անվտանգային խնդրին, որ մենք ի վերջո ՀԱՊԿ անդամ ենք եւ թշնամին իրավունք չունի անգամ մեկ սանտիմետր այն հատելուն վերաբերող հարցին, տիկին Կոստանյանը պատասխանեց. «Այսօր ունենք թույլ սահմաններ: Մի փոքր երերալով եմ այս արտահայտությունն անում, որովհետեւ հեշտ չէ ամեն անգամ խոսել քո երկրի թույլ սահմաններից, կամ թուլացած կարգավիճակից: Բայց սա է կարգավիճակը եւ ունենք այն, ինչ ունենք:
Ես կուզեի ավելի շատ անդրադարձ կատարել ներքաղաքական խառնաշփոթին, որ իրականում օր օրի ավելի է խորանում: Դա մեզ ավելի ու ավելի խոցելի է դարձնում նաեւ արտաքին մարտահրավերների առաջ: Եվ առաջիկայում խորհրդարանական ընտրությունները լինելու է այն հիմնական կիզակետը, որի արդյունքում պետք է կանխորոշվի այս իշխանությունների ճակատագիրը:
Մենք ունենք իրավիճակ, երբ սահմանին հաղթանակ տարած պետությունը ինքնավստահ կեցվածքով առաջ է գալիս: Եվ ունենք իրավիճակ, երբ Հայաստանի Հանրապետությունը պահպանող զինված ուժերը, կամ սահմանապահ ուժերը ինչ-ինչ հանգամանքներում թույլ են տալիս, որպեսզի Ադրբեջանի զինվորականները հանգիստ ձեւով մուտք գործեն Հայաստանի Հանրապետության տարածք: Սա փաստ է, որը անթույլատրելի է: Ի՞նչն է սրա պատճառը: Ըստ երեւույթին այն, որ հետպատերազմական Հայաստանում, ինքնիշխան պետության սահմանների պաշտպանվածությանը լուրջ չի մոտեցել մեր երկրի համապատասխան գերատեսչությունը: Սա էլ է քննության առարկա: Եվ այո, պիտի հնարավորիս շուտ ստեղծվի հանձնաժողով, որի մասին պատերազմն ավարտվելուց հետո որպես խորհրդարանական ընդդիմություն արդեն կես տարի անընդհատ բարձրաձայնում ենք: Մենք չենք կարող առաջնորդվել ասեկոսեներով, տարբեր պատմություններով: Հսկայական քանակի պատմություններ են պտտվում, յուրաքանչյուրն իր տեսակետն ու վերլուծությունն է ասում: Որքան ժամանակը ծորում է, այնքան այդ վերլուծությունները ավելի տարբեր բնույթներ են ստանում: Որպեսզի կարողանանք հստակ գնահատել իրավիճակը, պետք է հանձնաժողով, որը կունենա հստակ կարգավիճակ, կկարողանա քննության առնել ձեռքի տակ եղած փաստերը:
Կարդացեք նաև
Երկրի ներսում քաղաքական մթնոլորտը շիկացած է, ինչը անթույլատրելի է: Պիտի առաջին հերթին սա կարեւորել, որովհետեւ լուրջ մարտահրավերներ ունենք եւ որեւէ մեկը չի կարող երաշխավորել, որ վերահաս պատերազմը ամեն պահի կարող է վերսկսվել կամ չվերսկսվել: Պետք է պատրաստ լինել ամեն սցենարի: Իսկ առաջին հերթին պետք է լուծվեն ներքաղաքական խնդիրները, որն էլ ըստ երեւույթին առաջիկա խորհրդարանական արտահերթ ընտրություններով պետք է արվի»:
Աննա Կոստանյանի կարծիքով մթնոլորտի շիկացումը ուրեւէ քաղաքական ուժի չպետք է ձեռնտու լինի: «Ներքաղաքական աժիոտաժ առաջացնելով՝ մենք առնվազն խորացնելու ենք մեր խոցելիությունը արտաքին մարտահրավերների առաջ: Դա ակնհայտ է»,- ասաց ԼՀ կուսակցության պատգամավորը:
Աշոտ ՀԱԿՈԲՅԱՆ
