Մայիսի 18-ին ցույց է կազմակերպվել Ֆրանսիայի Ազգային ժողովի մոտ՝ ուշադրություն հրավիրելով Ադրբեջանում պահվող հայ ռազմագերիների խնդրի և Բաքվի կողմից Հայաստանի պետական սահմանները խախտելու վրա:
Գաբրիել Աթալ
Ցույցին ներկա է եղել նաև Ֆրանսիայի կառավարության խոսնակ Գաբրիել Աթալը: Ֆրանսահայ անկախ լրագրող Ժան Էքյանի փոխանցմամբ՝ Գաբրիել Աթալը հիշեցրել է, որ Ֆրանսիայի նախագահ Էմանուել Մակրոնն առաջինն էր, որ խոսեց ճշմարտության մասին, ինչի հետևանքով հարձակման ենթարկվեց Թուրքիայի կողմից: «Մենք կշարունակենք նախահարձակ լինել կարևոր առաջնահերթությունների հարցում՝ պահպանել Հայաստանի տարածքների ամբողջականությունը, որը նոր ներխուժման է ենթարկվել՝ ի հեճուկս միջազգային իրավունքի, և լուծում գտնել հայ բանտարկյալների համար, որոնք պահվում են Ադրբեջանում անտանելի պայմաններում»,- ասել է Աթալը:
Նա նաև նշել է, որ սոցիալական ցանցերում ընտանիքների վրա ճնշում գործադրելը «զզվելի է»: «Այսօր մենք ուզում ենք առաջ շարժվել ՄԱԿ-ի Անվտանգության խորհրդի շրջանակում»,- ասել է նա:
Կարդացեք նաև
Վալերի Բուայե
Ֆրանսիացի պատգամավորներ Պիեռ Ուզուլիասը, Վալերի Բուայեն, Դանիել Կազարյանը, Ֆրանսուա Պուպունին և Գի Տեսիեն դատապարտել են հայ գերիների նկատմամբ վայրագությունները, ինչպես նաև «միջազգային կոնվենցիաներով արգելված ամոթի թանգարանը»:
Պատրաստեց՝ Վիկտորյա ԱՆԴՐԵԱՍՅԱՆԸ
Լուսանկարները՝ Ժան Էքյանի
