Ազգային ժողովի նախկին պատգամավոր, ԵԿՄ նախկին նախագահ Մանվել Գրիգորյանի դստեր՝ Արմավիրի մարզի առաջին ատյանի ընդհանուր իրավասության դատարանի դատավոր Նաիրա Գրիգորյանի նկատմամբ կարգապահական վարույթ հարուցելու գործով՝ մայիսի 17-ին կայացած ԲԴԽ նիստում խորհուրդը գնաց խորհրդակցական սենյակ՝ որոշում կայացնելու:
Aavot.am-ի հետ զրույցում ԲԴԽ գիտնական անդամ Գրիգոր Բեքմեզյանը տեղեկացրեց՝ նիստին ներկա են եղել կողմերը, ԲԴԽ-ն լսել է նրանց դիրքորոշումները, և որոշումը կհրապարակվի մայիսի 31-ին՝ ժամը 14:30-ին:
Aravot.am-ի հետ զրույցում Նաիրա Գրիգորյանի փաստաբան Գուրգեն Գրիգորյանը նշեց՝ որպես իրավաբան՝ կարգապահական վարույթ հարուցելու խնդիր չի տեսնում: Նա մանրամասնեց. «Եթե ԲԴԽ-ն այս գործի բերած հանգամանքներով ինչ-որ ձևով փորձի պատժել դատավորին, դա ազդակ է լինելու. ամբողջ համակարգը փլուզվելու է: Դատարանների վիճակը գիտեք. ծանրաբեռնվածությունը և դրա հետ մեկտեղ արագ-արագ որոշումներ կայացնելու հարցը: Մի հարյուր հոգու իրավունքները կխախտվեն: Ուստի ես իմ սուբյեկտիվ կարծիքն եմ ասում. ԲԴԽ-ն այստեղ պատիժ նշանակելու ոչ մի հիմք չունի: Դա և′ իրավական տեսակետով է, և′ երկրորդ, հարուցման մյուս գործընթացների ժամկետները բաց են թողնված շուրջ մեկ ամսով»:
Հետաքրքրվեցինք՝ Նաիրա Գրիգորյանի նկատմամբ կարգապահական վարույթ հարուցելու հիմքում ի՞նչն է դրված, Գուրգեն Գրիգորյանը պատասխանեց. «Հիմքում դնում են ժամկետը, որ նա անհապաղ պետք է քններ գործը: Անհապաղ չի քննել, քննել է մեկ ամիս հետո, բայց դա երկրորդ որոշումն է եղել: Մեկ ամիս անց դատական նիստ է նշանակել և հարցը քնել է դատական նիստով: Ուղղակի օրենքն իմպերատիվ ասում է՝ ստանալուց անհապաղ պետք է քննել: Խնդիրն ընդամենը սա է»:
Կարդացեք նաև
Հետաքրքրվեցինք՝ միտումներ կամ ենթատեքստեր տեսնո՞ւմ է այս հարցում, մանավանդ, որ Նաիրա Գրիգորյանը Մանվել Գրիգորյանի դուստրն է, նա պատասխանեց. «Որպես իրավաբան՝ չեմ փորձում ինչ-որ միտումներ ու ենթատեքստեր տեսնել: Իմ կողմից նման տեսակետ արտահայտելը բարոյական էլ չի լինի: Մենք առարկությունները ներկայացրել ենք, միջնորդություն էլ արել ենք վարույթը կարճելու վերաբերյալ: Այսօր էլ պնդեցինք, որ վարույթը պետք է կարճվի, սակայն ԲԴԽ-ն որոշեց, որ պետք է քննել, և քննվեց»:
Տաթև ՀԱՐՈՒԹՅՈՒՆՅԱՆ
