«Ի՞նչ է նշանակում երեք նախագահներին ազգային համաձայնության դաշինքով մասնակցելու իմ առաջարկն այն պարագայում, երբ Ռոբերտ Քոչարյանի եւ Սերժ Սարգսյանի հետ ես ունեցել եմ մեղմ ասած ոչ բարեկամական հարաբերություններ։ Պատասխան․ նկատած կլինեք, որ սա վերջին շրջանում ՀՀ-ում ամենաշատ քննարկվող հարցն է։ Հրապարակ են նետվել հազար ու մի անհեթեթ մեկնաբանություններ, դավադրապաշտական տեսություններ եւ տարակուսանքներ, սակայն միայն քչերին է հաջողվել ըմբռնել այդ առաջակի քաղաքական բովանդակությունը»,-«Հայ ազգային կոնգրեսի» այսօրվա համագումարում հայտարարեց կուսակցության առաջնորդ, ՀՀ առաջին նախագահ Լեւոն Տեր-Պետրոսյանը։
Նա նշեց․ «Եվ դա անգամ այն պարագայում, երբ նրանց ուղղված իմ առաջարկի հրապարակված տեքստերում ես տվել եմ այդ համոզմունքի բանալին։ Այն է՝ մի կողմից խափանել Փաշինյանի վերարտադրությունը, մյուս կողմից՝ բացառել Ռոբերտ Քոչարյանի վերահաստատումը պետության ղեկին, ինչը երաշխավորվում էր երեք նախագահների կողմից պետական որեւէ պաշտոն չզբաղեցնելու իմ առաջարկած պայմանով։ Այդ դեպքում ո՞վ էր զբաղեցնելու վարչապետի պաշտոնը։ Իմ կարծիքով անհրաժեշտ է ձեւավորել տեխնոկրատների ճգնաժամային կառավարություն՝ լուրջ հմտություններով օժտված վարչապետի գլխավորությամբ։ Մյուս հարցը՝ ինչո՞ւ Ռոբերտ Քոչարյանը կտրականապես մերժեց իմ առաջարկը։ Քոչարյանի կողմից իմ առաջարկի մերժումը նշանակում էր, որ նա առաջնորդվում է ոչ թե պետական շահով, այլ բացառապես Փաշինյանից վրեժ լուծելու մոլուցքով։ Ուրիշ մոտիվացիա նա չուներ։ Սերժ Սարգսյանի պարագան այլ է։ Նա իշխանության վերադառնալու նպատակ չի հետապնդում եւ մասնակցելով ընտրություններին՝ պարզապես ուզում է իր պարտքը կատարել սեփական կուսակցության հանդեպ եւ ՀՀԿ-ականների թեկուզ փոքր խմբի ներկայացված տեսնել ԱԺ-ում։ Սա մարդկային տեսակետից գնահատելի քայլ է, բայց կապ չունի պետական շահի գիտակցության հետ»։
Լուիզա ՍՈՒՔԻԱՍՅԱՆ
