«Նախկին երկու հանցավոր վարչակարգերը, առաջնորդվելով ոչմիթիզականության եւ կեղծ հայրենասիրության սնանկ գաղափարներով, նաեւ՝ գլխավորելով կոռուպցիան ու թալանը, մեր պետությունն ու արցախյան բանակցությունները հասցրել էին իսկապես վտանգավոր հանգրվանի»,-«Հայ ազգային կոնգրեսի» այսօրվա համագումարում հայտարարեց կուսակցության անդամ Արման Մուսինյանը։
Նա նշեց․ «Սա ճիշտ արձանագրում է, բայց սա Նիկոլ Փաշինյանի համար ոչ թե պետք է առիթ լիներ ՀՀ-ի ղարաբաղյան քաղաքականությունը շիլափլավի վերածելու, բանակցությունները սեփական կետից սկսելու, հակառակորդի հետ հեգնական ու սպառնալից խոսելու, դաշնակիցների հետ հարաբերությունները փչացնելու, իսկ պարտությունից հետո իրեն թողնված ղարաբաղյան հարցի ծանր ժառանգությանը հղում անելու, այլ հակառակը․ եթե ստացել ես ծանր ժառանգություն, բոլոր քայլերդ տասնապատիկ անգամ զգույշ ու հաշվարկված պետք է լինեն։ Եթե մտնում ես խարխուլ տուն, ոչ մի կտրուկ շարժում չպետք է անել, էլ չասած՝ երկրորդ հարկ կառուցել։ Նիկոլ Փաշինյանը կայացրեց պատմության նոր շրջանի ամենախելագար, ցնորամիտ եւ հակապետական որոշումը, այն է՝ սադրել պատերազմ՝ ստատուս քվոն ի օգուտ Հայաստանի փոխելու նպատակով։ Նիկոլ Փաշինյանի գործողություններին որեւէ այլ բանական բացատրություն չկա։ Դա է հաստատում նրա որդեգրած՝ նոր պատերազմ, նոր տարածքներ թեզը։ Բացի այդ, նա ուներ մի քանի հնարավորություն պատերազմն ավելի վաղ կանգնեցնելու, որը չարեց։ Հիմա, այս աղետից հետո նա հանդգնում է իշխանության հայտ ներկայացնել՝ հանրության հետ խոսելով իր ձեռքի տակ մնացած միակ զենքով՝ նախկինների վերադարձի շանտաժով»։
Լուիզա ՍՈՒՔԻԱՍՅԱՆ
