«Ամուր պետության հիմքը ավանդական ընտանիքն է, մենք տենց ենք ապրել, տենց ենք ապրում եւ շարունակելու ենք նմանակերպ ապրել»,-այսօր ՀՀԿ եւ «Հայրենիք» կուսակցությունների՝ «Պատիվ ունեմ» դաշինքի հուշագրի ստորագրությունից առաջ իր ելույթի սկզբում ասաց ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը։
Նա ասաց, որ առաջիկայում շատ կխոսեն, թե այս երկու կուսակցություններին ինչն է միավորում, փորձելու են անել ամեն ինչ, որպեսզի ՀՀ քաղաքացին հստակ իմանա, թե ինչ ծրագրեր են իրականացնելու՝ իշխանության ղեկը ստանձնելուց հետո։
Կարդացեք նաև
«Բոլորիս սխալների ու բացթողումների հետեւանքով Հայաստանում իշխանության է եկել մի ուժ, որը կործանել է ամեն ինչ։ Մեր հայրենակիցների մի զգալի հատված այսօր սգակիր է, եւ դրանում մեղավոր ենք բոլորս։ Մենք պետք է լավ հասկանանք, որ կանգնած ենք պետականություն կորցնելու եւ նույնիսկ բնաջնջվելու իրական սպառնալիքի առջեւ։ Դրա վառ ապացույցն է օրերս թշնամու անարգել ներխուժումը Սյունիքի եւ Գեղարքունիքի մարզեր։ Այս սպառնալիքը հաղթահարելու միայն մեկ հնարավորություն կա՝ մեկտեղել մեր ժողովրդի բոլոր հնարավորությունները եւ կարողությունները, իրականացնել նվիրական եւ հետեւողական աշխատանք»,-ասաց Արթուր Վանեցյանը։
Նա հայտարարեց՝ լսելու եւ հասկանալու են Հայաստանի իրական խնդիրները եւ համատեղ ջանքերով հաղթահարելու դրանք․«Մենք համերաշխություն ենք բերելու Հայաստանին, եւ մեր դաշինքի ձեւավորումն այս խոսքերի վառ ապացույցն է։ Մենք ամրագրելու ենք, որ գիտենք, կարող ենք եւ կանենք։ Այլ տարբերակ չկա։ Բավական է արդեն։ Սիրելի՛ ժողովուրդ, իմ կոչը քեզ՝ ուղղի՛ր մեջքդ, կպնե՛նք գործին, որ ապրենք։ Արժանապատվորեն հայտարարում եմ՝ պատիվ ունեմ ծառայելու Արցախի Հանրապետությանը, Հայաստանի Հանրապետությանը եւ ամբողջ հայ ժողովրդին։ Պատիվ ունեմ»։
Նելլի ԲԱԲԱՅԱՆ
