«Կոնկրետ իմ ծննդավայրը վտանգի տակ է, և երբ ես երկու շաբաթ առաջ ԱԺ-ում հարց էի բարձրացնում մեր սահմանների կահավորման մասին, վարչապետը հեգնանքով պատասխանեց, թե ինչ պետք է, արվում է, և լավ է, որ դու և Ադրբեջանը չեք տեսնում: Եվ հիմա լա՞վ է, որ ադրբեջանցիներն արդեն ուրիշ բաներ են տեսնում»,- Սյունիքում, Գեղարքունիքում և Վայոց ձորում ստեղծված ճգնաժամային իրավիճակի առիթով հրավիրված ՀՀ ԱԺ արտահերթ նիստի ընթացքում հնչած ելույթում հայտարարեց «Իմ քայլը» խմբակցությունից դուրս եկած պատգամավոր Թագուհի Թովմասյանը:
Իմքայլականների՝ միասնականության կոչերի առիթով էլ ասաց. «Ո՞ւմ հետ միասնական լինենք, որ երբ իմ հայրենիքը մի քանի կմ-ով էլի փոքրացել է, դուք շարունակում եք հայտարարություն տարածել, թե պատգամավորի տված հարցի պատճառով ադրբեջանցիները հարձակվեցի՞ն: Լո՞ւրջ եք ասում, էս ի՞նչ դիսկուրս է: Դուք հասկանո՞ւմ եք՝ մեր երկրի հետ ինչ է կատարվում»:
Թագուհի Թովմասյանը հորդորեց չստել ու օրինակ բերեց, թե ինչպես էր մարզպետն ասում, որ ադրբեջանցիները մոլորված են եղել:
Իմքայլական Անդրանիկ Քոչարյանը ընդհատեց նրան՝ գոչելով՝ ինչո՞ւ եք խաբում, նման բան չի ասվել: Թագուհի Թովմասյանն էլ պնդեց. «Ասվել է, մարզպետներն են ասել: Մի խանգարեք ինձ: Դուք եք ստում, և ես փաստերով ասել եմ, որ ստել են»:
Կարդացեք նաև
Թագուհի Թովմասյանը նաև ահազանգեց, որ Գեղարքունիքի մարզում, որտեղ չունենք ռուսական որևէ ներկայություն, Կութից ունի ահազանգ, որ քաղաքացիներն անզեն են եղել, երբ ադրբեջանցիները մտել են իրենց տարածք: Փոխանցեց, որ խնդրում են գոնե հովիվներին զենք տալ:
Տաթև ՀԱՐՈՒԹՅՈՒՆՅԱՆ
