«Երեք օրվա ընթացքում մեխանիզմը սկսում է աշխատել։ Մեխանիզմը ենթադրում է արտահերթ խորհրդակցություններ ՀԱՊԿ-ի անդամ-երկրների մեջ, որի ընթացքում էլ ձեւավորվում են համապատասխան միջոցառումների առաջարկներ։ Միջոցառումների առաջարկներն էլ կախված են իրադարձությունների զարգացումից»,- խորհրդարանում լրագրողների հետ զրույցում ասաց ՀՀ ԱԳ փոխնախարար Արտակ Ապիտոնյանն` անդրադառնալով ՀԱՊԿ-ին Հայաստանի դիմումին:
Լրագրողներից մեկի դիտարկմանը, որ հակառակորդը 250 հոգանոց զինվորականներով հատել է պետական սահմանը, դա չի՞ նշանակում, որ Հայաստանը 4-րդ հոդվածով պետք է դիմեր ՀԱՊԿ-ին, փոխնախարարը պատասխանեց, որ անհրաժեշտություն կար սկսելու քննարկումները ՀԱՊԿ գործընկերների հետ՝ հասկանալու համար գործընթացը. «Պետք է նկատի ունենալ, որ ՀԱՊԿ-ի այս գործընթացը երբեք չի գործարկվել»։
ՄԱԿ-ի անվտանգության խորհուրդ դիմելու Ֆրանսիայի առաջարկի առնչությամբ էլ փոխնախարարն ասաց. «Մենք իրավիճակի մասին տեղեկացրել ենք թե ՀԱՊԿ-ի մեր գործընկերներին, թե ԵԱՀԿ-ի գործող նախագահողին եւ տեղեկացրել ենք ՄԱԿ-ի անվտանգության խորհրդի անդամներին»։
ԱԳ փոխնախարարը հաստատեց, որ Նիկոլ Փաշինյանը նամակ է գրել ՌԴ նախագահ Վլադիմիր Պուտինին։ Փոխնախարարն ասաց`նամակն ընթացքի մեջ է, նամակի բովանդակությունից մանրամասներ ներկայացնել հրաժարվեց:
Կարդացեք նաև
Նելլի ԳՐԻԳՈՐՅԱՆ
