«ՀՀ հարավը վտանգված է բոլոր կողմերից՝ արևելքից, արևմուտքից, հյուսիսից: ՀՀ իշխանություններն իրենց կեցվածքով վտանգ են ներկայացնում Սյունիքի համար: Հիմա Սյունիքը չորս կողմից վտանգված է»,- «Հենարան» մամուլի ակումբում ահազանգեց ադրբեջանագետ Արմինե Ադիբեկյանը:
Նա նկատեց՝ տեղի է ունենում այն, ինչ սպասվում էր և ինչի մասին խոսել էր դեռ 2019-ի աշնանը՝ պատերազմից մեկ տարի առաջ:
Անդրադառնալով ներկայիս իրավիճակին՝ ադրբեջանագետը փաստեց. «Ադրբեջանը, օգտվելով կապիտուլյացիայի հետևանքով ձեռք բերված բարենպաստ դիրքերից և հայկական կողմի անգործությունից, էլ ավելի բարելավում է իր դիրքերը և տարածքային ձեռքբերումների ծավալները մեծացնում: Այնտեղ, որտեղ տարածքները մատնված են անտերության, նրանք մոտեցնում են իրենց դիրքերը և արդեն սկսել են հենակետեր կառուցել: Սա է այսօրվա իրավիճակը ՀՀ հարավային սահմաններում: Ադրբեջանն օգտվում է այն քաոսից, որը Հայաստանում տիրում է հասարակության և իշխանության շրջանակներում»:
Արմինե Ադիբեկյանի համոզմամբ՝ իրավիճակից ելնելով՝ Ադրբեջանը նաև իր կոմունիկացիոն նախագծերն է իրագործում՝ հաշվի չառնելով ՀՀ շահերը: Միևնույն ժամանակ ադրբեջանագետը փաստեց, որ ՀՀ շահերի պաշտպանության համար պատասխանատու են ՀՀ իշխանությունները, ոչ թե Ադրբեջանը, Թուրքիան կամ Ռուասաստանը:
Կարդացեք նաև
Հարցին՝ ինչպե՞ս կգնահատի ՀՀ իշխանությունների ներկայիս կեցվածը, Արմինե Ադիբեկյանը պատասխանեց. «Եթե կարճ, դավաճանություն, ինչի մեջ մտնում է տգիտությունը, անգրագիտությունը, անպատրաստությունը, դիլետանտիզմը, վախկոտությունը և այսպես շարունակ»:
Տաթև ՀԱՐՈՒԹՅՈՒՆՅԱՆ
