«Սկզբունքային անհամաձայնություն ունենք։ Չի կարող լինել մտահոգություն, որ երրորդ նախագահը կարող է կատարել գործի քննությանը խոչընդոտող արարք։ Բոլոր հավանականությունները վերացած են»,-լրագրողների հետ ճեպազրույցում այսօր ասաց երրորդ նախագահ Սերժ Սարգսյանի շահերի պաշտպան Ամրամ Մակինյանը։
Նա հայտնեց, որ դատարանի որոշումը բողոքարկելու են։ Հիշեցնենք, որ առաջին ատյանի դատարանն այսօր մերժեց Սերժ Սարգսյանի խափանման միջոցը՝ ստորագրությամբ երկրից չհեռանալը, վերացնելու մասին նրա պաշտպանների միջնորդությունը։
Ամրամ Մակինյանը հիշեցրեց Սերժ Սարգսյանի կենսագրությունը եւ լրջանալու կոչ արեց․ «Գործ ունենք մի մարդու հետ, ով տասը տարի եղել է գերագույն գլխավոր հրամանատար։ Եղել է ոչ թե թրթռալով կամ գոռգռալով, այլ փաստացի․ ադրբեջանական բանակին անընդհատ շան ծեծ են տվել՝ 92թ․-ից մինչեւ 2016թ․-ը։ Նա այնպիսի հրամանատար է եղել, որի ձեռքը չի դողացել հրաման տալուց։ Եվ կասկածել, որ նա կարող է խոչընդոտել կամ թաքնվել․․․ումի՞ց է թաքնվելու»։
Հիշեցնենք, որ Սերժ Սարգսյանին մեղադրանք է առաջադրվել՝ «Ֆլեշ» ՍՊԸ սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գեւորգ Հարությունյանի օժանդակությամբ, վատնման եղանակով առանձնապես խոշոր չափի՝ մոտ կես միլիարդ ՀՀ դրամի հափշտակություն կազմակերպելու համար:
Կարդացեք նաև
Ամրամ Մակինյանը նաեւ կասկած հայտնեց, որ վարչապետի խորհրդական Աննա Վարդապետյանը երրորդ նախագահի գործին եւս միջամտել է․ «Այս գործընթացը շատ ցավոտ եւ անակնկալ է ավարտվելու»։
Լուիզա ՍՈՒՔԻԱՍՅԱՆ
