«Ես համոզված եմ, որ այս կամ այն կերպ հանգուցալուծման մենք հասնելու ենք, որովհետեւ շատ հստակ է, որ ադրբեջանական զինված ուժերն անցել են Հայաստանի Հանրապետության սուվերեն տարածքը, եւ մենք միանշանակ ցանկանում ենք խաղաղ ձեւով հանգուցալուծել իրավիճակը»,- Գորիսում լրագրողների հետ մայիսի 14–ին հանդիպմանն ասաց ՀՀ փոխվարչապետի պաշտոնակատար Տիգրան Ավինյանը՝ անդրադառնալով Սյունիքի մարզում ծավալվող իրադարձություններին։
Ըստ նրա՝ չնայած Հայաստանը պատրաստ է հանգիստ ու խաղաղ բանակցություններ իրականացնելուն, բայց պետք է պատրաստ լինի նաեւ հնարավոր վատ զարգացումներին:
«Պետք է նաեւ պատրաստ լինենք ոչ միայն մեր ինքնիշխան տարածքի պաշտպանությանը, այլ նաեւ նման վատ սցենարի դեպքում ակնկալում ենք մեր դաշնակիցների աջակցությանը։ Բայց ես հուսով եմ, որ մենք որեւէ վատ սցենարներ չենք ունենա այստեղ եւ բանակցությունների միջով բոլոր հարցերը կլուծենք»,– ասաց նա։
Փոխվարչապետի պաշտոնակատարը նշեց, որ ադրբեջանցիները ցույց են տալիս կեղծ քարտեզներ, որոնք անհայտ ծագման են եւ որեւէ կապ չունեն իրականության հետ. «Փաստացի այդ քարտեզների հիմքով են իրենց սահմանապահ զորքերն առաջ եկել: Բայց այնուամենայնիվ, ադրբեջանական կողմը հաստատում է խաղաղ կարգավորմանն ուղղված իր ջանքերը: Ըստ իրենց՝ իրենք որեւէ քայլ չեն ձեռնարկում եւ չեն ուզում ձեռնարկել հետագա լարումն ավելի խորացնելու համար, բայց մենք պատրաստ ենք բոլոր հնարավոր սցենարներին։ Երեկվա ԱԽ նիստը եւ մեր դիմումը ՀԱՊԿ-ին, նմանատիպ սցենարների հնարավոր զարգացման կանխարգելման մեխանիզմներին է ուղղված»,- ասաց Ավինյանը։
Կարդացեք նաև
Արմեն ԴԱՎԹՅԱՆ
