«Բուհերի ընդունելության հայտերի առաջին փուլն ավարտվել է, ինչից հետո պատրաստվում ենք քննություններին: Հայտերի ընդունման ժամանակ որեւէ խնդիր եւ խափանում չենք ունեցել»,-«Արմենպրեսի» մամուլի սրահում կայացած ասուլիսում նշեց ՀՀ ԿԳՄՍՆ Գնահատման և թեստավորման կենտրոնի փոխտնօրեն Կարո Նասիբյանը: Հավելեց, որ 24-ամյա ռեժիմով դիմորդները կարողացել են առցանց հայտագրվել:
«Մայիսի 10-ին, ժամը 18:00-ին ավարտել ենք հայտագրումը ու մինչ այս պահը դժգոհություններ, փոփոխություն ու բողոք չի եղել: 1-2 հոգի են եղել ընդամենը, որոնց ուղղորդել ենք հայտագրման երկրորդ փուլ»,- նշեց ԳԹԿ փոխտնօրենը:
Հայտագրման առաջին փուլի մասին խոսելով` շեշտեց, որ առաջին փուլում ներառել են բուհի ընտրությունը, մասնագիտության ընտրությունը եւ մասնագիտության համար պահանջվող քննությունների հայտագրումը եւ հանձնումը:
«Միայն նախորդ տարի ընդունելության քննությունները կազմակերպվեցին մեկ փուլով: Այս տարի ընդունելության քննությունները կազմակերպվելու են նախորդ տարիների նման երկու փուլով: Եվ առաջին փուլը, եւ երկրորդը հավասարազոր ընթացակարգեր են պարունակում: Առաջին եւ երկրորդ փուլի ավարտից հետո ենք միայն անցկացնում մրցույթ: Այսինքն, մրցույթը լինում է մեկը, իսկ քննություններն ու հայտագրման փուլերը բաժանել ենք երկու մասի:
Կարդացեք նաև
Երկրորդ փուլը նախատեսում ենք բանակից զորացրվածների, Սփյուռքից եկած մեր հայրենակիցների, ինչպես նաեւ այն դիմորդների համար, որոնք այս կամ այն պատճառով չեն կարողացել հայտագրվել առաջին փուլում: Երկրորդ փուլը հունիսի 26-ից մինչեւ հուլիսի 1-ն ընկած ժամանակահատվածն է ընդգրկում»,-հայտնեց պարոն Նասիբյանը:
Այնուհետեւ ներկայացրեց, թե ինչպիսին է պատկերը առաջին փուլից հետո. «Միասնական քննություն հանձնողների թիվը Հայաստանի Հանրապետությունում 10957 է, Արցախի Հանրապետությունում` 529: Արցախի Հանրապետությունը քննությունը կազմակերպում է մեր թեստերով, եւ քննությունների օրերն էլ նույնն են, ինչպես Հայաստանի Հանրապետությունում:
Միասնական քննություններ հանձնողների ընդհանուր թիվը կազմում է 11486, ներբուհական քննություններ հանձնողներինը` 1899: Ներբուհական քննություններ հանձնում են արվեստի, մշակույթի, սպորտի բնագավառի բուհերի դիմորդները: Իսկ բանավոր քննություններ հանձնողների թիվը` ներառյալ ստեղծագործական աշխատանքը, 854 է »,-ասաց ԳԹԿ փոխտնօրենը:
Նա հավելեց, որ դիմորդների թվով առաջին տեղում մաթեմատիկան է` բացառությամբ Տավուշի մարզի եւ Արցախի Հանրապետության: Այդտեղ հիմնականում գերակշռում է հայոց լեզու եւ հայ գրականություն հանձնողների թիվը: Դիմորդների թվով երկրորդ տեղում անգլերենն է, երրորդ տեղում` հայոց լեզու եւ հայ գրականությունը:
Գոհար ՀԱԿՈԲՅԱՆ
