Հայաստանի շախմատի ֆեդերացիայի նախագահ Սերժ Սարգսյանը որոշում է կայացրել, ըստ որի ՀՇՖ օրացուցային պլոնում ընդգրված մրցաշարերում (ներառյալ այդ մրցաշարերի փուլերը) արգելվում է այլ կազմակերպություններին մասնակիցներից անդամավճարներ գանձել:
Երեւանի շախմատի ֆեդերացիայի փոխնախագահ Նորայր Քալանթարյանը Aravot.am-ին ասաց, որ խոսքն ըստ էության մեկ մրցաշարի մասին է՝ Հայաստանի առաջնության ընտրական փուլի, որի մեջ մտնում է Երեւանի առաջնությունը:
Պարոն Քալանթարյանի խոսքով մինչեւ հիմա մայրաքաղաքի առաջնությունը կազմակերպել է Երեւանի շախմատի ֆեդերացիան, որը դրա համար Հայաստանի ֆեդերացիայից գումարային փոխհատուցում չի ստացել ու յուրաքանչյուր մասնակցից որպես մասնակցության մուտքավճար գանձել է 3000 դրամ: «Այս որոշումը կիրառվել կարող է եկող տարվանից: Գուցե, հանրապետական ֆեդերացիայում որոշել են, որպեսզի այսուհետեւ Երեւանի առաջնությունը իրենք կազմակերպեն, կամ էլ՝ կշարունակենք մենք անցկացնել եւ այսուհետեւ փոխհատուցում կլինի: Սպասենք: Բայց, իմ կարծիքով սա տրամաբանական որոշում է»,-ասաց նա:
Աշոտ ՀԱԿՈԲՅԱՆ
