«Սահմանագծի փոփոխությունից հետո կան վայրեր, որտեղ բնակլիմայական պայմանները, ռելիեֆը շատ բարդ են, եւ հակառակորդը տեղակայման գործընթաց չէր արել, հիմա եղանակային պայմանները փոխվել են տեղակայման գործընթաց են անում»,-կառավարության նիստից առաջ, պատասխանելով հարցին՝ ի՞նչ է կատարվում Վերին Շորժայի հատվածում, ասաց Գեղարքունիքի մարզպետ Գնել Սանոսյանը:
Ըստ մարզպետի, մեր սահմանապահ ուժերը հետեւում են, որ հակառակորդն իր տեղակայման վայրերից «հանկարծ առաջ չգա»:
Պարոն Սանոսյանը նաեւ ասաց, որ Հայաստանի պետական սահմանն, ի տարբերություն Սյունիքում Սեւ լիճ հատվածում տեղի ունեցած միջադեպի, այս դեպքում պահպանվել է, պարզապես մեկ-երկու տեղ լանջով սահմանագիծ է եղել, որը հայկական կողմը պնդել է, որ պետք է մի քիչ հետ տան, ինչը ընթացքում կարգավորվել է: Ըստ նրա «այդ հատվածում բացարձակապես լարվածություն չկա, իրադրությունը հանգիստ է»:
Հարցին՝ կարո՞ղ են բնակիչները հանգիստ լինել, Գնել Սանոսյանն ի պատասխան ասաց՝ բնակիչները հիմնականում անհանգիստ են լինում տարածվող կեղծ լուրերի հետեւանքով. «Երեկ ես մի քանի ժամ եղել եմ Վերին Շորժայում, եղել եմ այդ հատվածում, որտեղ այդ աշխատանքներն են կատարվում, մեր զինված ուժերը ներկա են, աշխատում են քարտեզները….: Ընդամենը սա այն գործընթացն է, որը կար նոյեմբեր-դեկտեմբերին: Բնակիչներից շատ մարդ կար այնտեղ եւ տեսել են այդ ամենը: Պարզապես սահմանագիծը ճշգրտում են»:
Կարդացեք նաև
Հարցին՝ մարդիկ չեն հավատում պաշտոնական պարզաբանումներին, քանի 44-օր հանրությունը կեղծ տեղեկատվություն է ստացել, ինչպե՞ս հավատան մարզպետի խոսքերին, Գնել Սանոսյանը պատասխանեց՝ օրերի ընթացքում իրականությունը տեսնելով. «Կտեսնեն, որ խնդիր չկա»:
Սոթքի ոսկու հանքի վերաբերյալ հարցին էլ մարզպետն ասաց՝ հանքն աշխատում է, բայց մոտ 280 մարդ կրճատվեց:
Լուսինե ԲՈՒԴԱՂՅԱՆ
