«Համարում եմ, որ մեր նախընտրական քարոզարշավի ժամանակ նաև հանրության կողմից պահանջ է լինելու, թե ինչ քայլեր են անելու Արցախի հարցով»,-«Տեսակետ» մամուլի ակումբում հրավիրված մամուլի ասուլիսի ժամանակ վստահեցրեց «Մարդկային զարգացման միջազգային կենտրոնի» ղեկավար Թևան Պողոսյանը:
Նրա համար նախընտրական գործընթացի ժամանակահատվածն ունի առաջնահերթ խնդիր: Այս առիթով պարզաբանեց. «Գործող իշխանությունները պիտի կրեն քաղաքական պատասխանատվություն և հեռանան: Դա թիվ մեկ խնդիրն է»:
Թևան Պողոսյանը չցանկացավ իր նախապատվություններից խոսել՝ պատճառաբանելով, որ դա կանի այն ժամանակ, երբ բոլոր ուժերն արդեն հայտ ներկայացրած կլինեն:
Նա փաստեց՝ կա զանգված, որ Նիկոլ Փաշինյանի կողքին է լինելու՝ թիմակիցները, վարչական ռեսուրսը և այլն, ուստի այս դեպքում կարևոր է, թե ինչպես ենք անում ընտրությունը: Նրա կարծիքով՝ ճիշտ կլինի մասնակցել ընտրության և չընտրել Նիկոլ Փաշինյանի գլխավորած ուժին: Թևան Պողոսյանը կարծում է, որ Նիկոլ Փաշինյանը հասնելու է ԱԺ, այսպես թե այնպես լինելու ընդդիմադիր դաշտում:
Կարդացեք նաև
Իսկ այս ընտրությունների միջոցով ձևավորված ԱԺ-ն երկար կյանք չի ունենալու: Թևան Պողոսյանն ասաց. «Այս ընտրությունների միջոցով ձևավորված խորհրդարանն ունենալու է մեկուկես-երկու տարվա կյանք: Չեմ զարմանա, որ այդ ճգնաժամային փուլը շարունակենք և կրկնենք Իտալիայի, Հունաստանի օրինակները»:
Տաթև ՀԱՐՈՒԹՅՈՒՆՅԱՆ
