«Ստեփանակերտը մարդաշատ է, բայց մարդաշատության խնդիրն այլ կերպ պետք է դիտարկել: Շուշիի ու Հադրութի շրջանների փախստականների խնդիրն է: Նրանք են նաև Ստեփանակերտում, իրենց բարեկամների մոտ են, քանի որ իրենց տները կորցրել են»,-«Տեսակետ» մամուլի ակումբում հրավիրված մամուլի ասուլիսի ժամանակ Ստեփանակերտից իր տպավորություններն այսպես ներկայացրեց «Մարդկային զարգացման միջազգային կենտրոնի» ղեկավար Թևան Պողոսյանը:
Ըստ նրա՝ միայն մեքենաների թվով չպետք է որոշել քաղաքում իրավիճակը, այլ թե ինչ գաղափարներ ու հոգեբանական վիճակ ունի բնակչությունը: Նա փաստեց. «Ամենացավալի հետպատերազմական փուլում ենք, երբ հոգեբանական սինդրոմները սկսում են գլուխ բարձրացնել: Ապագայի անկանխատեսելիությունն է ամենակարևոր հարցը»:
Թևան Պողոսյան
Թևան Պողոսյանը ցավում է, որ արտաքին միջազգային հարաբերություններում կարծես չկա Արցախի խնդիր, ավելի շատ լսում ենք ադրբեջանական կողմին. հայկական կողմից չկա նախաձեռնողականություն: Թևան Պողոսյանը քննադատեց նաև, որ հայկական կողմն անգամ Մինսկի խմբի համանախագահների հայտարարություններին շատ դժվարությամբ է արձագանքում, այն դեպքում, երբ ադրբեջանական կողմից արձագանքը միանգամից գրանցվում է:
Թևան Պողոսյանի համոզմամբ՝ ՀՀ նոր ԱԺ-ի ձևավորումից հետո այդ նորընտիր խորհրդարանը պետք է ձեռնամուխ լինի Արցախի անկախության ճանաչմանը: Նա պարզաբանեց. «Խոսում են դեօկուպացիայի մասին, էն տարածքների, որոնք դեռ չե՞ն ճանաչել: Մեր հանրությանը պետք չէ վախեցնել, որ ճանաչումից հետո պատերազմ է սկսվելու: 44-օրյա պատերազմն եղավ և դեռ չի դադարել»:
Կարդացեք նաև
Թևան Պողոսյանը ցավով փաստեց, որ այսօր Արցախը Հայաստանին կապվում է իր բնորոշմամբ՝ «փոքրիկ պորտալարի նման 5 կիլոմետրանոց երևույթով»: Նա շարունակեց. «Այն էլ շատ դեպքերում չի պահպանվում, երբեմն քեզ կկանգնեցնեն ճանապարհին, որ ադրբեջանական մի մեքենա անցնի կամ ռուս խաղաղապահների շարասյունն անցնի: Դա սկսում է մարդկանց վրա հոգեբանորեն ազդել: Եթե առաջ կար Քարվաճառի և Բերձորի հնարավորությունը. մի քանի ճանապարհ Արցախը Հայաստանի հետ կապելու, մարդիկ կարող էին հասցնել իրենց կանանց, երեխաներին տարհանել, հիմա որ վաղը պատերազմը սկսվի, այդ հնարավորությունը չենք ունենալու»:
Խոսելով Սյունիքում տեղի ունեցած դեպքերի՝ մասնավորապես ադրբեջանական զորքի առաջխաղացման և պարզաբանումների մասին, թե պատճառը ձնհալն է եղել, Թևան Պողոսյանն ասաց. «Եթե միայն ձնհալն է պատճառը, ինչո՞ւ են զորքեր հանում, բանակային կորպուսները թիվ 1 պատրաստության բերում: Ինչո՞ւ չենք կարողանում նախօրոք հաղորդակցվել հանրության հետ»:
Տաթև ՀԱՐՈՒԹՅՈՒՆՅԱՆ
