Սույն թվականի մայիսի 7-ին «Հետք» ինտերնետային թերթում լրագրող Տիրայր Մուրադյանի հեղինակությամբ հրապարակված «Էկոնոմիկայի փոխնախարարի ընկերներն ու այլ պաշտոնյաների կանայք՝ մեկ ՊՈԱԿ-ում» վերնագրով հոդվածի առնչությամբ ՀՀ էկոնոմիկայի նախարարությունում, նախարարի պաշտոնակատար Վահան Քերոբյանի հանձնարարությամբ, ուսումնասիրություն է իրականացվում վերոնշյալ հոդվածում նշված փաստերի առնչությամբ։
Մեզ համար չափազանց կարևոր է նախարարության հեղինակությունը: Նախարարության յուրաքանչյուր աշխատակից պետք է գիտակցի քաղաքացիական ծառայող լինելու պատասխանատվությունը և ձգտի իր բարեխիղճ աշխատանքով ու բարոյական նկարագրով բարձր պահել պետական գերատեսչության վարկանիշը հասարակության շրջանում։
Քաղաքացիական ծառայության թափուր պաշտոնի համալրման գործընթացը պետք է լինի մրցակցային, թափանցիկ և արդար: Մենք կարևորում ենք մասնագիտական հմտությունները. լավագույն մասնագետները պետք է համալրեն պետական կառույցների աշխատակիցների շարքերը՝ անկախ բարեկամական, ազգակցական կամ այլ կապերից:
Միաժամանակ հարկ ենք համարում շեշտել, որ անընդունելի և դատապարտելի է պաշտոնատար անձի կողմից հովանավորչական որևէ գործունեություն․ նման երևույթների նկատմամբ նախարարությունը դրսևորելու է անհանդուրժողականություն և հետևողական է լինելու դրանց բացահայտման ու վերացման գործում:
Կարդացեք նաև
Ուսումնասիրության արդյունքների մասին հանրությանը հավելյալ կտեղեկացնենք։
Էկոնոմիկայի նախարարություն
