«Չգիտեմ, թե որքանով է սահմանադրությանը համահունչ հայտարարելը, թե նախընտրական դաշինքը որպես նպատակ ունի ոչ թե գալիք ընտրություններում հաղթելը, այլ օրինական ընտրությունների միջոցով ձևավորված իշխանությանը հեռացնելը։ Ի վերջո, ամեն ուժի նպատակը պետք է լինի սահմանադրական»,-խորհրդարանական ճեպազրույցների ժամանակ այսօր հայտարարեց «Իմ քայլի» պատգամավոր, ԱԺ պետաիրավական հարցերի հանձնաժողովի նախագահ Վլադիմիր Վարդանյանը՝ անդրադառնալով ՀՅԴ-ի, «Վերածնվող Հայաստանի» եւ երկրորդ նախագահ Ռոբերտ Քոչարյանի ձեւավորած «Հայաստան» դաշինքի հանրահավաքում հնչած հայտարարություններին, թե իրենք հեռացնելու են գործող իշխանությանը։
«Դաշինքի նախաձեռնողները թող սահմանադրականության տեսանկյունից ուսումնասիրեն այդ հայտարարությունները։ Հեռացնել իշխանությունից կարող է միայն ժողովուրդը։ Իշխանության կրողը ժողովուրդն է։ Որեւէ դաշինք չի կարող որպես նպատակ հայտարարել իշխանությանը հեռացնելը։ Եթե որեւէ մեկը այլ կարծիքի է, ասեք։ Որեւէ մեկը չի կարող իշխանության տիրոջ դիրքերից կարծիքներ արտահայտել»,-համոզմունք հայտնեց Վլադիմիր Վարդանյանը։
Ինչ վերաբերում է Ռոբերտ Քոչարյանի պնդմանը, թե ինքը հաղթելու է եւ իր մտքով չի էլ անցել, որ իշխանության հայտ կներկայացնի, Վարդանյանը նշեց․ «Հուսամ՝ քաղաքացու հիշողությունն ամուր է։ Ցավում եմ, որ անգամ ԸՕ փոփոխություններից հետո ոչ թե գաղափարների մասին ենք խոսում, այլ անձանց։ Այդ դաշինքի մեջ այլ սուբյեկտներ էլ կան, օրինակ՝ մեկը մոտ հարյուրամյա պատմություն ունի, ուստի այդ դաշինքը պետք չէ հանգեցնել միայն Ռոբերտ Քոչարյանի անվանը։ Նրա նկրտումները երբեք չեն դադարել։ Վերադարձեք 2008թ․, նման նկրտումները միշտ են եղել»։
Լուիզա ՍՈՒՔԻԱՍՅԱՆ
