«Մեր բոլորի ակնկալիքը, երազանքը նույնն է. ցանկանում ենք վերադառնալ Շուշի, տեսնել մեր Շուշին եռագույնի ներքո, ապրել մեր Շուշիում, վերագտնել մեր Շուշիի խաղաղությունը»,-«Շուշիի դեօկուպացիա» ՀԿ բացման հանդիսավոր միջոցառման ընթացքում լրագրողների հետ զրույցում հայտարարեց կազմակերպության համահիմնադիր Արմինե Հայրապետյանը:
Նա տեղեկացրեց՝ կազմակերպությունը հիմնադրվել է՝ ստեղծված իրավիճակին արձագանքելով, փորձելով տեղական ու միջազգային կառույցներին համախմբել հիմնական լուծման գործում: Նա հավաստիացրեց՝ փորձելու են աջակցել բնակիչներին ստեղծված իրավիճակը հաղթահարելու գործընթացում:
Միջոցառման ընթացքում ելույթով հանդես եկան կազմակերպության խորհրդի անդամները, համահիմնադիրներ, գործընկերներ և ներկայացրին ՀԿ հիմնադրման անհրաժեշտությանը, պատմամշակութային ժառանգության պահպանության առաջնահերթությանը, հայրենաճաչողության ամրապնդմանը, Հայաստան-Արցախ-Սփյուռք եռամիասնության ամրապնդմանն ու զարգացմանն առնչվող հարցեր:
Ըստ Արմինե Հայրապետյանի՝ «Շուշիի դեօկուպացիա» ՀԿ-ի գործունեության հիմնական ոլորտներն են իրավականն ու մշտադիտարկումը: Նա մանրամասնեց. «Գործելու է իրավական կենտրոնը, որի շրջանակներում անդրադառնալու ենք իրավագիտակցության բարձրացմանը, քաղաքացիների իրավական հիմնախնդիրների լուծման աջակցությանը, հիմնախնդրի վերաբերյալ իրավական հետազոտության խթանմանը: Մյուս ուղղությունը մոնիտորինգի՝ մշտադիտարկման իրականացումն է: Մշտադիտարկման կենտրոնի միջոցով փորձելու ենք նպաստել համալիր տեղեկատվության ձևավորմանը և շարունակական արագ արձագանքման խմբերի միջոցով արձագանքել բնակիչների առաջնային կարիքների լուծմանը»:
Կարդացեք նաև
Լրագրողների հարցին՝ իրատեսակա՞ն է Շուշի վերադառնալու երազանքը, Արմինե Հայրապետյանը պատասխանեց. «Լիահույս եմ, որ մոտ ապագայում համատեղ ուժերով այս ամենն իրականություն կդառնա: Մեր խնդիրն է բարձրաձայնել բոլոր հարցերի կարևորությունը, փորձել մեր գործունեությամբ վերահաստատել Շուշիում բնակվելու՝ մեր կամքն ու պատրաստակամությունը և անել հնարավորը, որ մեր երազանքն իրագործվի»:
Տաթև ՀԱՐՈՒԹՅՈՒՆՅԱՆ
