«Ֆինանսական անսահման հնարավորություններով օժտված մեկը, որը վերջերս ՀՀ-ում ֆիլմ պատվիրեց, այն ցուցադրվեց բոլոր կինոթատրոններում։ Անտաղանդ, անբովանդակ, հիմար ֆիլմ է։ Նման ֆիլմերը հետագայում պետք է ստանան հարկային արտոնություններ։ Իմաստը ո՞րն է»,-«Կինեմատոգրաֆիայի մասին օրենքի» քննարկման ժամանակ այսօր դիմելով նախագծի հեղինակ, «Լուսավոր Հայաստանի» պատգամավոր Աննա Կոստանյանին՝ ասաց «Իմ քայլի» պատգամավոր Հայկ Գեւորգյանը։
Նա օրինակ էր բերում հետեւյալ հարցադրումների համար․ «Որքանո՞վ եք վստահ, որ հարկային արտոնությունների բացակայությունն է լավ ֆիլմեր չնկարելու պատճառը։ Որքանո՞վ եք վստահ, որ ՀՀ-ում լավ ֆիլմեր չեն նկարում այդ պատճառով»։
Աննա Կոստանյանն արձագանքեց, որ պնդումը միանշանակ չէ․ «Չկա երաշխիք։ Դրա համար մրցութային հանձնաժողովներ կան, ըստ որոնց կորոշվի՝ պետական հատկացումներ տա՞ն, թե ոչ»։
Հիշեցնենք, որ երրորդ նախագահ Սերժ Սարգսյանը վերջերս ներկա էր ռեժիսոր Մհեր Մկրտչյանի «Իշխանություն» ֆիլմի ցուցադրությանը։
Կարդացեք նաև
Լուիզա ՍՈՒՔԻԱՍՅԱՆ
