Պատերազմի եւ հետպատերազմյան շրջանի հետ կապված բոլոր հարցերը պետք է պարզաբանվեն քրեական գործերով։ Այս մասին ԱԺ լիագումար նիստում այսօր ՀՀ դատախազության 2020թ․-ի տարեկան հաղորդման քննարկման ժամանակ հայտարարեց ՀՀ գլխավոր դատախազ Արթուր Դավթյանը։
«Դրանք պետք է պարզաբանվեն բացառապես քրեաիրավական գործընթացների արդյունքում։ Բոլորի համար էլ ակնհայտ է լինելու, թե կոնկրետ իրավիճակում ում պատասխանատվությունը եւ ում մեղքն ինչպես է դրսեւորվել։ Ներքին՝ զինվորական ծառայության դեմ ուղղված բազմաթիվ քրեական գործեր են հարուցվել։ Շատ հստակ պետք է ասեմ, որ անձամբ ես եւ դատախազությունը հետեւողական ենք, որ պատերազմին առնչվող բոլոր հանցավոր դրսեւորումները, պատերազմին պատրաստ լինելու կամ այն վարելու վերաբերյալ հարցերը պարզաբանվեն քրեական գործերով»,-վստահեցրեց Դավթյանը։
Ինչ վերաբերում է պատերազմի ընթացքում Ադրբեջանի կողմից իրականացված ռազմական հանցագործություններին՝ Արթուր Դավթյանը հայտարարեց․ «Դատախազությունը հետեւողական է, որպեսզի բացահայտվի ամեն զինվորականի եւ պաշտոնյայի, հրաման արձակողի մեղքը, որպեսզի այն հիմնավորվի պատերազմական հանցագործությունների կատարման մեջ։ Ապացույցների ձեռքբերման գործընթացն ամենօրյա է։ Ադրբեջանի ռազմաքաղաքական ղեկավարությունն այդ հարցում մեզ օգնում է քաղաքական հայտարարություններով, որոնք կարեւոր ապացուցողական նշանակություն են ունենալու»։
Կարդացեք նաև
Լուիզա ՍՈՒՔԻԱՍՅԱՆ
