«Պարոն Սիմոնյան, դուք մեզ մեղադրեցիք մինչեւ այսօր ոչ հայամետ գործունեություն ծավալելու մեջ։ Ուղղակի կխնդրեմ ձեր խմբակցությանը որեւէ ձեւաչափ որոշել եւ միասնական դիրքորոշում ընտրել, ու այդ մասին մեզ տեղյակ պահել։ Որովհետեւ չի կարելի առաջարկել ատելության խոսքը բացառող հուշագիր ստորագրել, ինչը մենք ողջունեցինք, ու հետո գալ այստեղից ու մեզ մեղադրել հայամետ գործունեություն չծավալելու մեջ»,-ԱԺ լիագումար նիստում այսօր հայտարարեց «Իմ քայլի» պատգամավոր Վահագն Ալեքսանյանը։
Հիշեցնենք, որ «Լուսավոր Հայաստանից» Տարոն Սիմոնյանն այսօր ուրախացել էր ու զարմացել այն փաստից, որ իշխանական պատգամավորները դատապարտել էին Շուշիի մայր տաճարի հանդեպ ադրբեջանական բարբարոսությունը։ Սիմոնյանն ասել էր․ «Վերջապես գործընկերներս վերադարձան հայամետ քաղաքականությանը»։
Արձագանքելով Ալեքսանյանին՝ Տարոն Սիմոնյանն իր հերթին փաստեց, որ այո, ատելության մթնոլորտը պետք է վերացնել․ «Ես արեցի այդ արտահայտությունը, որովհետեւ քանիցս նշել եմ՝ իշխանության հայտարարություններն օգտագործվում են Ադրբեջանի կողմից իրավական գործընթացներում ՀՀ-ի դեմ։ Փաստերն ունեմ։ Կարո՞ղ եք արդարացում փնտրել։ Չեք կարող։ Զգուշավոր պետք է լինեք ձեր հայտարարություններում, որոնք իրավական գործընթացներում ձեր դեմ են օգտագործվում։ Եթե սա հայամետություն եք համարում, ապա ես չեմ կարող այդպես համարել»։
Կարդացեք նաև
Լուիզա ՍՈՒՔԻԱՍՅԱՆ
