Այսօր լրագրողների հետ ճեպազրույցում գլխավոր դատախազ Արթուր Դավթյանն ասաց, որ ապօրինի գույքի բռնագանձման հետ կապված շատ բարդ ու ծանր աշխատանք է իրականացվում, առաջիկայում կունենան նաեւ հայցեր՝ դատարան ներկայացվելիք: Խոսքը 5 հայցի մասին է, որը դատարան կմտնի հավանաբար հուլիսին:
Լրագրողները հետաքրքրվեցին՝ ձեր եռահարկ առանձնատան հետ կապված էլ հարցադրումներ կան՝ ինչո՞ւ ապօրինի ծագում ունեցող գույքի բռնագանձման մի վարույթ էլ այդ առանձնատան հետ կապված չի հարուցվում՝ գլխավոր դատախազը պատասխանեց. «Ես չեմ կարող ասել՝ այսօր կլինի, վաղը կլինի, տասը տարի հետո կլինի՝ ցանկացած մեկը կարող է ապացուցել: Ես կարող եմ մի բան ասել մենակ՝ բարոյական առումով չունենալ իրավունք մեկ ուրիշին ապօրինի գույքի մեղադրանք ներկայացնելու կամ գույքը բռնագանձելու: Հո 10 տարի հետո ես չե՞մ լինելու, ով երբ ուզում է՝ անի: Դուք արեք: Իմ անելու համար էլ առիթներ են պետք: Ինձ պետք է մեղադրեն հանցագործության մեջ, այդ ժամանակ նոր…Դու երբեւէ փորձե՞լ ես ինքդ քեզ մեղադրես հանցագործության մեջ, հաղորդում տվե՞լ ես քո վերաբերյալ»,- ասաց գլխավոր դատախազը՝ դիմելով հարցն ուղղող լրագրողին:
Հռիփսիմե ՋԵԲԵՋՅԱՆ
