Եվրամիության նախարարների խորհուրդը ապրիլի 28-ին կայացած հերթական հանդիպումից հետո կոչ է արել ավարտին հասցնել Արցախյան վերջին պատերազմից հետո գերեվարված անձանց վերադարձի հարցը՝ անկախ նրանից, թե ինչ հանգամանքներում են նրանք ձերբակալվել:
«Եվրամիությունը ողջունում է տեղում հրադադարը, որը ձեռք է բերվել 2020թ. նոյեմբերի 9-ի համաձայնագրով, և մի քանի դրական արդյունքներ այնպիսի հարցերի շուրջ, ինչպիսիք են զոհերի աճյունների վերադարձը և հակամարտությունից զգալիորեն տուժած բնակչության մարդասիրական օժանդակության դրույթը»,- ասվում է հայտարարության մեջ:
ԵՄ-ն այնուամենայնիվ ընդգծել է, որ անհրաժեշտ է վերսկսել ջանքերը երկու երկրների միջև վստահության կառուցման ուղղությամբ և առաջընթաց գրանցել կայուն խաղաղության հարցում: «Դրա համար անհրաժեշտ է զերծ մնալ թշնամական և վիրավորական հռետորաբանությունից, հնարավորինս շուտ ավարտին հասցնել ռազմագերիների և այլ պահվող անձանց վերադարձը, անկախ նրանց ձերբակալման հանգամանքներից, և համագործակցել այլ կարևոր հարցերի շուրջ, ինչպիսին է ականազերծումը»,- ասվում է փաստաթղթում:
«Այս համատեքստում, Մարդու իրավունքների եվրոպական դատարանի կողմից Նախարարների կոմիտեին վերջերս ուղարկված Դատարանի կանոնակարգի 39-րդ կանոնում նշված միջանկյալ միջոցառումների վերաբերյալ ծանուցումից հետո, մենք շեշտում ենք, որ Դատարանի նախադեպային իրավունքը հստակորեն հաստատել է, որ Մարդու իրավունքների եվրոպական կոնվենցիայի մասնակից պետությունները պարտավոր են կատարել միջանկյալ միջոցները, և մենք կոչ ենք անում Ադրբեջանին տրամադրել դատարանի կողմից պահանջվող տեղեկատվությունը»,- ասվում է հայտարարության մեջ:
Կարդացեք նաև
Հայտարարությանը միացել են Ալբանիան, Անդորրան, Հայաստանը, Բոսնիա և Հերցեգովինան, Իսլանդիան, Լիխտենշտեյնը, Մոնտենեգրոն, Հյուսիսային Մակեդոնիայի Հանրապետությունը, Նորվեգիան և Սան Մարինոն:
Պատրաստեց Վիկտորյա ԱՆԴՐԵԱՍՅԱՆԸ
