Վերջերս Aravot.am-ն անդրադարձել էր մի թեմայի, որ ֆեյսբուքյան գրառման պատճառով աշխատանքից ազատվել էր Լոռու մարզպետարանի գյուղատնտեսության բաժնի ավագ մասնագետ Արշակ Բաղդասարյանը:
Վերջինս մեզ հետ զրույցում նշել էր, որ իր գրառումների պատճառով մարզային իշխանությունների կողմից ինքը ենթարկվել էր քաղաքական հետապնդման:
Լոռու մարզպետ Արամ Խաչատրյանն այսօրվա մամուլի ասուլիսի ժամանակ վստահեցրեց, որ Արշակ Բաղդասարյանն աշխատանքից ազատվել է օրենքով սահմանված կարգով, եւ նրա նկատմամբ որեւէ քաղաքական հետապնդում չի եղել: Նա նաեւ նշեց, որ իրենք կասկածներ ունեն, թե ինչպես է աշխատանքի ընդունվել Արշակ Բաղդասարյանը. «Քանի որ կա անմեղության կանխավարկած, թույլ տվեք չբարձրաձայնեմ, թե խոսքն ինչի մասին է, բայց մենք մեր կասկածները գրավոր դիմել ենք իրավապահ մարմիններին, նրանք կզբաղվեն եւ առաջիկայում ականատեսը կլինենք»:
Կարդացեք նաև
Մարզպետի խոսքը շարունակեց ասուլիսին ներկա մարզպետարանի իրավաբանական բաժնի պետ Ալիկ Սահակյանը. «Ինչ վերաբերվում է Արշակ Բաղդասարյանի աշխատանքի ընդունվելուն, համապատասխան գրություններ են ներկայացվել քննչական մարմնին, որպեսզի պարզվի կեղծ փաստաթղթով աշխատանքի ընդունման հանգամանքը»:
Մանրամասները՝ տեսանյութում
Տաթեւիկ ՂԱԶԱՐՅԱՆ
