Ինչպես արդեն տեղեկացրել ենք, դատարանը որոշում է կայացրել 2 ամսով կալանավորել Հայկ Հեքիմյանին:
Հիշեցնենք՝ ապրիլի 22-ին Երևանում՝ դատախազության դիմաց տեղի ունեցած բողոքի գործողությունների առթիվ հարուցվել էր քրեական գործ, որի շրջանակներում Հայկ Հեքիմյանը մեղադրվում է Քրեական օրենսգրքի 316-րդ հոդվածի առաջին մասով՝ Իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ դա գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ:
Հայ հեղափոխական դաշնակցություն կուսակցության Գերագույն մարմնի անդամ Արծվիկ Մինասյանը, որը նաև Հայկ Հեքիմյանի ազգականն է, լրագրողների հետ զրույցում ասաց. «Ակնհայտ է, որ սա ոչ միայն քաղաքական հետապնդում է և Հայաստանը ունեցավ ևս մեկ քաղաքական բանտարկյալ, նաև ցույց է տալիս այս իշխանության իրական դեմքը: Դատավորի և նաև դատարանի նախագահի նման պահվածքը ակնհայտորեն վկայում է, որ կատարվում է քաղաքական պատվեր: Երբ ծանոթանում ես որոշմանը, սա իրավական ծաղր է, իրավական պետության ծաղր: Կալանավորման հիմքերը ոչ միայն իրականությունից դուրս են, ենթադրյալ ինչ-որ բաներ, այլև ակնհայտորեն վկայում են այն մասին, որ մենք գործ ունենք քաղաքական հստակ պատվեր կատարելու վիճակի հետ: Ակնհայտ է նաև, որ այսպիսի որոշումները չեն կարող նաև երկար կյանք ունենալ: Ավելին՝ սրանք չեն կարող սահմանափակել այն պայքարը, որը որդեգրվել է հանուն հայրենիքի փրկության, ինչքան էլ փորձի քաղաքական իշխանությունը»:
Ամի ՉԻՉԱԿՅԱՆ
