«Ստացվում է, որ նախընտրական հանդիպման ժամանակ տեղից բղավող եւ դժգոհ քաղաքացու ասածը կհամարվի քարոզարշավի խոչընդոտո՞ւմ։ Եթե որեւէ թեկնածուի ասվում է, թե ինչու է նա եկել իրենց համայնք, այդ մարդուն պետք է բռնեն տանե՞ն։ Այս օրինագիծը շատ ռիսկային է»,-խորհրդարանում լրագրողների հետ ճեպազրույցում այսօր անդրադառնալով «Իմ քայլից» Վահագն Հովակիմյանի հեղինակած օրինագծին, որով նախընտրական քարոզարշավի խոչընդոտումը քրեական պատասխանատվություն է ենթադրում՝ ասաց «Իմ քայլից» դուրս եկած պատգամավոր Թագուհի Թովմասյանը։
«Կարող է հոգոց հանես, ու դա դիտվի խոչընդոտում։ Խոչընդոտման եղանակները նկարագրված չեն օրինագծում։ Խնդիրն այն է, որ ռեպրեսիաների ճանապարհն են ընտրել, իսկ նման օրենքները հնարավոր չի կիրառել։ Սա մահակ է լինելու՝ քարոզարշավի ժամանակ անցանկալի մարդկանց մեկուսացնելու համար»,-նշեց Թագուհի Թովմասյանը։
Լուիզա ՍՈՒՔԻԱՍՅԱՆ
