Լեհաստանում ավարտված գրեփլինգի Եվրոպայի առաջնության վերջին օրը կիմոնոյով մրցաձեւում երրորդ տեղի համար գոտեմարտելու իրավունք ստացած Հայաստանի հավաքականի չորս անդամներից եւ ոչ մեկին չհաջողվեց բրոնզե մեդալ նվաճել: Խանգարեց թե մրցափորձի պակասը, թե իրենց համար նոր մարզաձեւի նրբություններին դեռեւս մինչեւ վերջ չտիրապետելը:
Մարզիկները գրեփլինգ տեղափոխվել են մենամարտային այլ մարզաձեւերից, իսկ գրեփլինգում կանոնները խրթին են ու երբեմն էլ թվում են անտրամաբանական:
Ասվածի ամենավառ օրինակը 66 կգ քաշային կարգում Ասլան Պողոսյանի հետ տեղի ունեցածն է: Լեհ Վոյցեխ Յան Պայակի հետ գոտեմարտի ավարտից 32 վայրկյան առաջ մեր մարզիկը հաշվի մեջ առջեւում էր՝ 5:2 եւ աշխատում էր վերեւից: Սակայն գործողություններից մեկի ժամանակ նա ձայն հանեց, ինչին անմիջապես հետեւեց մրցավարի՝ գոտեմարտն ավարտված համարելու եւ Ասլան Պողոսյանին պարտություն գրանցելու հրահանգը: Պատճառն այն էր, որ գրեփլինգում արտաբերված ցանկացած բարձր ձայն գնահատվում է որպես «հանձնվելու» ազդանշան: Ու որքան էլ մեր մարզիկն ու մարզիչը մրցավարներին համոզում էին, որ դա ամենեւին էլ այդպես չէ, նրանք մնացին անդրդվելի:
Աշոտ ՀԱԿՈԲՅԱՆ
