«Կա սահմանադրական թնջուկ, սահմանադրական խնդիր։ Անգամ սահմանադրագետներն այս հարցի հետ կապված ոչ հստակ մոտեցում ունեն»,-խորհրդարանում լրագրողների հետ ճեպազրույցում այսօր անդրադառնալով հարցադրմանն այն մասին, որ իրավաբանները պնդում են՝ Նիկոլ Փաշինյանը հրաժարական տալուց հետո չի կարող լինել պաշտոնակատար, ինչո՞ւ ԲՀԿ-ն ԼՀԿ-ի հետ չեն դիմում սահմանադրական դատարան՝ այս հարցին լուծում տալու, ասաց «Բարգավաճ Հայաստանի» պատգամավոր Իվետա Տոնոյանը։
«Եթե գնանք այս հարցերի բացահայտման ճանապարհով, նախընտրական գործընթացը հետ է շպրտվում, մինչդեռ մեր առաջնահերթություններից է հունիսի քսանը։ Այս պահին նման քննարկում չենք ունեցել ՍԴ դիմել-չդիմելու հարցում»,-նշեց նա։
Ինչ վերաբերում է այս առիթով առաջին նախագահ Լեւոն Տեր-Պետրոսյանի գնահատականին, թե ԼՀԿ-ն ու ԲՀԿ-ն հակասահմանադրական պայմանավորվածության մեջ են Փաշինյանի հետ, Իվետա Տոնոյանն ասաց․ «Առաջին նախագահին խորհուրդ եմ տալիս սահմանադրագետների մոտեցումներին ծանոթանալ։ Որոշակի կարծիք չկա։ Մեզ կամ «Լուսավոր Հայաստանին» ինչ-որ բանում մեղադրելու միտում եմ տեսնում եւ կարծում եմ, որ մեղադրողներն այլ օրակարգ են սպասարկում։ Լավ կլինի անկեղծանան ու ասեն, թե ինչ օրակարգ են սպասարկում։ Մենք միայն մեր օրակարգն ունենք եւ որեւէ մեկի օրակարգը չենք սպասարկում»։
Կարդացեք նաև
Լուիզա ՍՈՒՔԻԱՍՅԱՆ
