«Բարգավաճ Հայաստան» խմբակցության պատգամավոր Իվետա Տոնոյանը սյունեցիների վերաբերյալ իշխանության ներկայացուցիչների վերջին շրջանի հայտարարություններում «սեւերի-սպիտակների» բաժանման միտում է տեսնում եւ դատապարտում դրանք։ «Որ մարզում ծափերով են ողջունում իշխանությանը, այդ մարզը լավն է, ցանկալի է, յուրային է, իսկ որտեղ ոչ ցանկալի խոսք է հնչում, բացասական պիտակավորում են տալիս այդ մարզին։ Այդպես չի կարելի։ Մեկ հայրենիք ունենք, իսկ քաղաքացին ազատ է իր դիրքորոշման մեջ»,-խորհրդարանում լրագրողների հետ ճեպազրույցում այսօր ասաց Իվետա Տոնոյանը։
Նա նշեց․ «Մշտապես կարելի է մեղադրել, թե Սյունիքի բողոքի ցույցներն ուղղորդողներ են եղել։ Այդ տրամաբանությամբ մանկահասակ երեխաներին վարչապետի հետ հանդիպման բերելու գործում եւս կան ուղղորդողներ։ Լավ կլիներ, որ իշխանությունը նույն ջանասիրությամբ այդ անձանց էլ բացահայտեր»։
Լուիզա ՍՈՒՔԻԱՍՅԱՆ
