«Բարեհամբույր առաջարկում եմ իրեն՝ դահլիճից հնչեցրածը թող գնա եւ հնչեցնի Սյունիքի որեւէ բնակավայրում։ Թող սյունեցիները որոշեն, թե ինչպես կողջունեն նրան»,-խորհրդարանում լրագրողների հետ ճեպազրույցում այսօր անդրադառնալով «Իմ քայլի» պատգամավոր Վահագն Ալեքսանյանի՝ ԱԺ ամբիոնից հնչեցրած ձեւակերպումներին այն մասին, թե Սյունիքում վարչապետ Նիկոլ Փաշինյանի դեմ ցույցերի հետեւում կանգնած են Ռոբերտ Քոչարյանի կողմնակիցները՝ ասաց «Իմ քայլից» դուրս եկած սյունեցի պատգամավոր Աննա Գրիգորյանը։
«Մի բան կարող եմ վստահեցնել, որ կազմակերպված խմբեր չեն եղել։ Ես գիտեմ սյունեցիների դժգոհությունն ու տրամադրությունները»,-նշեց նա։
Աննա Գրիգորյանը հավելեց․ «Ես Վահագն Ալեքսանյանին չեմ ճանաչում, բայց երբ նա ասում է, թե սյունեցին այսպիսին է կամ այնպիսին, ուզում եմ հարցնել՝ նա առհասարակ ի՞նչ կապ ունի սյունեցու հետ։ Քանի՞ սյունեցու դարդին է դարման եղել, քանիսի՞ խնդիրներն է փորձել լուծել»։
Կարդացեք նաև
Աննա Գրիգորյանը բոլոր նրանց, ովքեր այստեղից զգացմունքային տոնով խոսում են Սյունիքի մասին, հորդորեց գնալ եւ այդ հայտարարությունները հենց Սյունիքում անել․ «Այն պատգամավորները, որոնք ասում են, թե Սյունիքում անվտանգ է, դե գնացեք ու ապրեք այնտեղ»։
Աննա Գրիգորյանը նաեւ նկատեց՝ վարչապետը գնաց Սյունիք, բայց այդպես էլ որեւէ բառ չասաց Սյունիքի անվտանգության մասին։ «Սյունեցին անվտանգ չէ, որքան էլ ոմանք հակառակը պնդեն։ Աբսուրդ է, երբ իշխանությունը չի պատկերացնում, թե ինչպես կարող է ապահովել քաղաքացիների անվտանգությունը»,-եզրափակեց նա։
Լուիզա ՍՈՒՔԻԱՍՅԱՆ
