Այսօր ԱԺ արտահերթ նիստ է հրավիրվել, որի օրակարգում երկու հարց է՝ ՀՀ Քրեական օրենսգրքում փոփոխություններ կատարելու մասին փաթեթը եւ Հարկային օրենսգրքում փոփոխության նախագիծը:
Պատգամավորները տարակուսած էին՝ ե՞րբ են այս փոփոխությունները ուժի մեջ մտնելու, որովհետեւ ընտրական գործընթացի հետ կապված փոփոխություններ են, կարո՞ղ է ընտրություններից 10 օր առաջ ուժի մեջ մտնի ու նոր կանոններով գնան ընտրության:
Արման Բաբաջանյանն ասաց, որ այս երկու նախագծերը խիստ կարևոր են ընտրական գործընթացի համար, որ ընտրություններն ավելի ազատ, արդար ու թափանցիկ անցկացնելու իրավիճակ ստեղծեն. «Ես հեռու եմ այն մտքից, որ մեզ հաջողվելու է ազատ, արդար ընտրություններ անցկացնել, որովհետեւ ձեր թողտվությամբ ընտրական պրոցեսում արդեն ներգրավվել են պսեվդո-քաղաքական որոշ գործիչներ, շրջանակներ, որոնք շատ հեռու են այդպիսի ընտրություններ անցկացնելու հեռանկարից»:
Հիմնական զեկուցող Վահագն Հովակիմյանն ասաց, որ այդ վատատեսությունը չի կիսում, իրենք կամք ունեն անցկացնելու արդար ընտրություններ:
Կարդացեք նաև
Ավելի ուշ իր ելույթում Արման Բաբաջանյանն ասաց. «Մենք կարող ենք առանց այս փոփոխությունների գնալ ընտրությունների: Ինչ վերաբերում է ազատ, արդար եւ թափանցիկ ընտրություններ անցկացնելու ձեր կամքին, հանձնառությանը, այն , ինչ տեղի է ունենում մեր երկրով մեկ, վաղուց արդեն ձեր կամքի հետ կապ չունի: Որոշ շրջանակներ արդեն ոչ թե փողեր են բաժանում, այլ՝ ավտոմեքենաներ, անշարժ գույք: Իրավապահների հետ խոսել եմ, անզոր են, չեն կարողանում արձագանքել այդպիսի ահազանգերին: Սա՝ ի գիտություն»:
Հռիփսիմե ՋԵԲԵՋՅԱՆ
