ՍԴ աշխատակազմի նախկին ղեկավար Էդգար Ղազարյանն այսօր մեկնաբանեց Նիկոլ Փաշինյանի՝ հրաժարականի մասին հայտարարությունում եւ դրանից առաջ մարզերից մեկում հնչեցրած մի քանի հայտարարություններն այն մասին, թե իր հրաժարականի պարագայում Ազգային ժողովում ինչ են անելու եւ հնարավոր որ քայլին ինչ է կարող է հաջորդել:
«Ներկայացրած նկարագրության մեջ, որը առկա է իր հրաժարականի տեքստում եւ հայտարարել է նաեւ մարզերից մեկում՝ կանխորոշելով իշխանության օրենսդիր մարմնի բոլոր հնարավոր գործողությունները, բացարձակ ապօրինություն եւ մեկ այլ տիպի հանցագործություն է: Այդպես նա յուրացնում է նաեւ օրենսդիր իշխանության լիազորությունները, հանդես է գալիս օրենսդիր իշխանության անունից եւ ասում, թե պառլամենտը ինչ գործողություններ է անելու: Եվ եթե պարզվի, որ այդ նկարագրությունները եւ հետագա փաստերը համապատասխանեն, նշանակում է, որ նա փաստացի յուրացրել է նաեւ պառլամենտի լիազորությունները, ինչը այլ քրեական գործի նյութ է:
Բայց տեսեք ինչ է ստացվում: Եթե պառլամենտը իր առաջադրված թեկնածուին երկու անգամ չընտրի, նշանակում է նա չի ուզում նրան տեսնել վարչապետի պաշտոնում: Իսկ եթե պառլամենտի չի ուզում, որ դու մնաս վարչապետի պաշտոնում, ինչպե՞ս կարող ես մնալ այդ պաշտոնում ցանկացած կարգավիճակով»,- ասաց պարոն Ղազարյանը:
Հարցին, թե արտահերթ ընտրություններին ընդառաջ խորհրդարանական եւ արտախորհրդարանական կուսակցությունների հետ ձեռք բերված պայմանավորվածությունները տեղավորվո՞ւմ են օրենքի եւ օրինականության շրջանակներում, Էդգար Ղազարյանը պատասխանեց. «Ես կարծում եմ, որ դա ենթադրյալ խմբային հանցագործության առերեւույթ տարրեր է պարունակում: Դա ըստ էության ոչ թե պայմանավորվածություն է, այլ հանցավոր համաձայնություն: Իմ կարծիքով, տվյալ դեպքում մենք գործ ունենք կազմակերպված հանցավոր խմբի հետ, որի մեջ ներգրավված են բարձրաստիճան պաշտոնատար անձինք, ԱԺ պատգամավորներ եւ այդ հանցախմբի նպատակն է՝ իշխանության զավթումը ապօրինի ճանապարհներով»:
Կարդացեք նաև
Աշոտ ՀԱԿՈԲՅԱՆ
