Բույաբեսը ծովամթերքներով եւ բանջարեղենով ձկնապուր է, որի հայրենիքը համարվում է ֆրանսիական Մարսել քաղաքը, սակայն նմանատիպ ապուրներ պատրաստում են միջերկրյածովյան շատ երկրներում: Բույաբեսի պատրաստման շատ տարբերակներ կան՝ ամենահեշտից մինչեւ չափազանց աշխատատար եւ անիմաստ բարդացված: Տարբերակը, որ առաջարկում եմ, լիովին հնարավոր է պատրաստել նաեւ Հայաստանում, այն մթերքները, որ ներառված են, կան հայաստանյան սուպերմարկետներում:
Անհրաժեշտ մթերքները
Ձիթապտղի յուղ-100 մլ
Սոխ (պրաս կամ սպիտակ սոխ)-1 հատ
Կարդացեք նաև
Սխտոր-3 պճեղ կամ 1-2 հատ կանաչ ճյուղ
Գազար-1 հատ
Նեխուրի ձողիկ-1 հատ
Ֆենխել (պարտադիր չէ)- կես հատ
Կծու պղպեղ- կես հատ (կարող եք փոխարինել աղացած չիլի պղպեղով)
Ծովամթերքի խառնուրդ- 0,5 կգ (երեւանյան սուպերմարկետներում վաճառվում է սառեցված ծովամթերքի տեսականի)
Թարմ ձկան կտորներ-2-3 կտոր
Սպիտակ գինի- 100 մլ
Լոլիկի պյուրե-0,5 լիտր
Կապար (каперсы) կամ ձիթապտուղ- մի քանի հատիկ
Ձկան արգանակ-1,5 լիտր
Ձկան արգանակի համար հարկավոր է՝
Ձկան գլուխ եւ ոսկորներ, գազար, նեխուր, սոխ, սխտոր, աղ, դափնու տերեւ, սեւ պղպեղ եւ ջուր
Պատրաստման եղանակը
Սկզբում պատրաստում ենք ձկան արգանակը: Կաթսայի մեջ դնում ենք ձկան ողնաշարը, գլուխը, լողակները, կես գազար, կես գլուխ սոխ կամ պրաս սոխի վերեւի կոշտ կանաչ հատվածը, 1 պճեղ սխտոր, նեխուրի ձողիկ կամ տերեւները, եթե ունեք ֆենխել, ապա ֆենխելի կոշտ շերտը նույնպես կարող եք ավելացնել: Այս ամենի վրա լցնում եք 1,5-2 լիտր ջուր եւ դնում եփվելու: 20 րոպեից ավելացրեք 1 ճաշի գդալ աղ, 4-5 հատիկ սեւ, չաղացած պղպեղ, 2 հատիկ դափնու տերեւ: 5 րոպե անց անջատեք:
Մինչ արգանակը եփվում է, մաքրեք, լվացեք եւ կտրատեք սոխը, սխտորը, գազարը, նեխուրը, ֆենխելը:
Կաթսան դրեք կրակին, մեջը լցրեք ձիթապտղի յուղը, հենց տաքանա՝ ավելացրեք կտրատած բանջարեղենը: Երբ բանջարեղենը տապակվի, ավելացրեք գինին, 1-2 րոպե անց ավելացրեք նաեւ լոլիկի պյուրեն: Երբ մի փոքր եփվի, ձեռքի կոտորակիչով (blender) հարեք ամբողջ զանգվածը, մինչեւ դառնա միատարր: Ավելացրեք ձկան արգանակը: Թողեք եփվի 5 րոպե, ավելացրեք սառեցված ծովամթերքը, ձկան կտորները, կապարը կամ ձիթապտուղը: 5-6 րոպեից կարող եք անջատել:
Բույաբեսը կարող եք մատուցել կիտրոնի շերտի եւ չորացրած հացի կտորների՝ կրուտոնների հետ:
Ձկնապուրի պատրաստման մանրամասները՝ տեսանյութում.
Բարի ախորժակ:
Պատրաստեց Մելանյա Բարսեղյանը
