Հայոց ցեղասպանության 106-րդ տարելիցի կապակցությամբ ելույթներով հանդես են եկել իտալացի մի շարք քաղաքական գործիչներ:
Պատգամավորների պալատի անդամ, Արտաքին հարաբերությունների մշտական հանձնաժողովի փոխնախագահ Պաոլո Ֆորմենտինին իր ելույթում խոսել է ցեղասպանության զոհ դարձած քրիստոնյա նահատակների մասին, ինչպես նաև Լեռնային Ղարաբաղում տեղի ունեցած ողբերգության մասին՝ ընդգծելով, որ «այժմ հայկական այլ հողերն ու հայկական երիտասարդ ժողովրդավարությունն է գտնվում սպառնալիքի տակ»: Խոսելով Հայաստանին սպառնացող պանթուրքիզմի մասին՝ Ֆորմենտինին նշել է. «Պետք է կանգնենք հայկական երիտասարդ ժողովրդավարության կողքին»:
Ելույթով հանդես է եկել նաև սենատոր Ալբերտո Աիլորան, որը նշել է. «Ապրիլի 24-ը անմարդկային դաժանության ենթարկված անմեղ տղամարդկանց, կանանց ու երեխաների հիշատակի օրն է»:
Մի խումբ սենատորներ և պատգամավորներ հանդես են եկել տեսաուղերձով, այդ թվում Սենատի Արտաքին հարաբերությունների հանձնաժողովի փոխնախագահ Ստեֆանիա Կրաքսին, ով հայկական ցեղասպանությունը անվանել է «մայր» ցեղասպանություն՝ նշելով, որ «այն իրական հանցագործություն է մարդկության դեմ»:
Կարդացեք նաև
Օրեր առաջ ցեղասպանության 106-րդ տարելիցի կապակցությամբ տեսաուղերձ էր հղել նաև Լեգա կուսակցության առաջնորդ՝ Սենատոր Մատեո Սալվինին, որը Հայոց ցեղասպանությունը համարել է պատմության մեջ տեղի ունեցած առաջին ցեղասպանությունը՝ ընդգծելով. «Ես օգտագործում եմ մի բառ, որը Թուրքիայում ազատազրկման պատճառ կարող է դառնալ»: Իր խոսքում սենատորը հույս է հայտնել մոտ ապագայում լինել Հայաստանում՝ այն բնորոշելով որպես «հպարտ, քաջ և ազատ երկիր»:
Եվրախորհրդարանի փոխնախագահ Ֆաբիո Մասսիմո Կաստալդոն, ով տեսաուղերձով իր համերաշխությունն է հայտնել հայերին, կոչ է արել իր բոլոր եվրոպացի քույրերին և եղբայրներին «միանալ հայ ժողովրդին՝ հիշելով և ոգեկոչելով այս վայրագության և բոլոր ցեղասպանությունների զոհերի հիշատակը»։
Տեսաուղերձով են հանդես եկել նաև պատգամավորներ Էմիլիո Կարելլին և Մաուրիցիո Լուպին:
Անի ՎԱՐԴԱՆՅԱՆ
