«Իշխանությանը քանիցս կոչ եմ արել պարզաբանել, հստակ տեղեկություն տալ՝ ի՞նչ է սպասվում Մեղրիին, ի՞նչ է լինելու, բայց լռություն է»,-լրագրողների հետ ճեպազրույցում այսօր ասաց Մեղրիի համայնքապետ Մխիթար Զաքարյանը։
Նա նշեց՝ չի ուզում մեկնաբանի Նիկոլ Փաշինյանի այն ասածը, որ եթե Ալիեւն ուզում է «Զանգեզուրի միջանցք», ապա մենք էլ կուզենք «Նախիջեւանի միջանցքը»։
«Տրամաբանությունս վիրավորվում է։ Ցավում եմ այս իրավիճակի համար, որովհետեւ վարչապետի պաշտոնը զբաղեցնողն իմ համար նախեւառաջ գլխավոր հրամանատար է։ Այդ պաշտոնը զբաղեցնողը եւ անտրամաբանական հայտարարությունները․․․ ո՞վ է իրեն թողնելու Նախիջեւանի միջանցքից օգտվի․․․ ախր ասելով չի, հարեւաններն արդեն երկաթգիծ են կառուցում, Ադրբեջանը գնացքներ է պատվիրել։ Կոմունիկացիաներից արժանապատվորեն օգտվելը ճիշտ է, բայց հայկական կողմի շահը չենք տեսնում, միայն հարեւան պետությունների ղեկավարներն են այդ մասին խոսում։ «Մեղրիի միջանցքը» ո՞րն է։ Խնդրում եմ, մի օգտագործեք այդ եզրույթը»,-կոչ հղեց համայնքապետը։
Լուիզա ՍՈՒՔԻԱՍՅԱՆ
