Յուրաքանչյուր մարդ կյանքի ամեն փուլում պետք է մտածի իր մասնագիտության որակավորման կարողությունների մասին: ՀՊՄՀ պրոռեկտոր Մհեր Մելիք-Բախշյանի խոսքով. «Միտումները մասնագիտական նախընտրելիության տարիների ընթացքում պետք է փոխված լիներ, բայց շարունակում է մնալ նույնը: Եթե հինգ-վեց տարի առաջ նախընտրելիությունը իրավաբան, տնտեսագետ, բժիշկ մասնագիտությունների գծով էր, այս վերջին տարիների վերլուծությունը ցույց է տալիս, որ այս երեք նախընտրելիությանն ավելացել է տեղեկատվական տեխնոլոգիանների ոլորտի մասնագիտությունների պահանջարկը: Մասնավորապես՝ ինժեներ, ծրագրավորող, ցանցային ադմինիստրատոր: Աղջիկների մոտ դիզայն մասնագիտությունն է պահանջարկված, խոհարարությունը, որը բավականին պահանջարկված է նաեւ տղաների կողմից»:
Այսօր շուկայում կա՞ աշխատանք մասնագետների համար:
«Խնդիրը չպետք է դիտարկել ոչ թե մասերի ձեւով, այլ պետք է դիտարկել ամբողջ համակարգի առումով: Այստեղ շատ կարեւոր է, որ մարդը հասկանա, թե տվյալ մասնագիտության որակավորումը ստանալուց ուր է գնալու: Այսօր բավական առաջընթաց ունենք խորհրդային տարիների համեմատությամբ, եւ թերեւս մի շարք այլ կրթական մակարդակներում իրականացվող կրթությունից չափորոշիչները պետք է հիմնված լինեն ուսումնառության արդյունքների վրա:
Եթե ասում են տնտեսագետ, բայց չեն պատկերացնում տնտեսագետը որտեղ պետք է աշխատի, ինչ կրթություն պիտի ստանա եւ հետագայում իր առաջխաղացումը որտեղ պետք է լինի: Նախընտրում են բժիշկ, բայց առավելապես ավարտելով Բժշկական համալսարանը, գնում են պասիվ բժշկության (ապահովագրական գործ, դեղագործություն): Բժշկության ոլորտում մենք այսօր լուրջ խնդիր ունենք, խնդիր՝ ոչ միայն մասնագիտության նախընտրելիության հարցում, այլ պատկերացնելու, թե տվյալ մասնագիտությունը ինչ նկարագիր ունի եւ անձը հետագայում ինչպես պետք է ապահովի իր զբաղվածությունը»,-ասում է մեր զրուցակիցը:
Կարդացեք նաև
Այսինքն, խնդիրը մասնագիտական կողմնորոշման համակա՞րգն է՝ այս հարցին ի պատասխան էլ նշում է. «Հետխորհրդային Հայաստանում չենք ունեցել եւ չունենք մասնագիտական կողմնորոշման համակարգ, ինչը խանգարում է աշակերտներին ընտրել մասնագիտություն՝ հաշվի առնելով որոշակի արժեքներ:
Մեր խնդիրն է պարզապես վերապատրաստել հանրակրթական, մասնագիտական, ուսումնական հաստատություններում եւ զբաղվածության տարածքային կենտրոններում աշակերտների, ուսանողների, երիտասարդների եւ այլ անձանց, որոնք կարիք ունեն մասնագիտական կողմնորոշման»:
Վիկտորյա ՍԱՐԳՍՅԱՆ
«Առավոտ» օրաթերթ
23.04.2021
