«Երեկվա Թուրքիան այսօրվանը չէ, ինչպես ասում են՝ թուրքը մնում է թուրք, բայց Թուրքիան փոփոխվում է»,- «Հայկական նախագիծ» գիտակրթական ՀԿ-ի՝ ԵՊՀ արևելագիտության ֆակուլտետի հետ համագործակցությամբ անցկացվող «Հայաստանը և Թուրքիան Հարավային Կովկասում. իրողություններ և ռիսկեր» խորհրդաժողովի ժամանակ հայտարարեց իրանագետ Վարդան Ոսկանյանը:
Խոսելով Հարավային Կովկասում Թուրքիա-Իրան մրցակցության մասին՝ նա նկատեց՝ երկու պետություններն էլ գտնվում են դինամիկ զարգացման մեջ: Ի տարբերություն Թուրքիայի՝ Իրանն ավելի մեծ ռեսուրսներ ունի: Դրա համար էլ հիմա Թուրքիան փորձում է ամեն կերպ ամրագրել էրդողանական Թուրքիայի ձեռքբերումները:
Անդրադառնալով Իրանին՝ նա ասաց. «Իրանական պետությունը, սահմանափակված լինելով աշխարհի թիվ մեկ գերտերության հետ հակամարտությամբ, որը 40 տարի անընդմեջ տևում է, միևնույն է, այս համատեքստում իրանական պետականությանը հաջողվել է նաև դառնալ գերտերություն Մերձավոր Արևելքում: Ի տարբերություն Թուրքիայի՝ իրանական ռեսուրսների բազան անհամեմատ ավելի մեծ է»:
Անդրադառնալով թուրքական ներկայությանը տարածաշրջանում՝ նա ասաց. «Այդ կետերը ոչ միայն շահերի բախման տիրույթում են, այլև գաղափարախոսական: Համաթյուրանական գաղափարը Իրանին ձեռնտու չէ: Նույն Ադրբեջանին իր տիրույթից բաց թողնելու և Իրանի տարածքային ամբողջականության տեսանկյունից»:
Կարդացեք նաև
Ամփոփելով՝ Վարդան Ոսկանյանը որոշ կանխատեսումներ արեց. «Իրանն աստիճանաբար սկսելու է ավելի մեծ կարևորություն տալ այս տարածաշրջանին: Հիմա նրա արտաքին քաղաքական օրակարգում Հարավային Կովկասն ավելի բարձր դիրքեր է զբաղեցնում: Վերջին պատերազմը պատերազմ էր նաև Իրանի դեմ: Այդ պատերազմը պատերազմ էր ոչ միան մեր, այլև Ռուսաստանի դեմ: Իրանցիների քաղաքական օրակարգում Հարավային Կովկասը, Հայաստանը և Ռուսաստանը շատ ավելի կարևոր տեղ են զբաղեցնում: Եթե հաշվի առնենք, որ նույնիսկ իմ նշած սահմանափակման քաղաքականության շրջանակներում էլ թուրքական ներկայությունն այս տարածաշրջանում կարծես սահմանափակվելու է, գումարած դրան ռուսական գործոնը, ապա մենք գտնվում ենք մի տարածաշրջանում, որը պատկերավոր ասած նման է վառոդով լցված տակառի: Ցավալի է այն, որ մենք այդ տակառի համար ապահովում ենք միայն վառոդը, իսկ արտաքին քաղաքական ուժերը շարունակելու են այս տարածաշրջանում մրցել: Մեր իմաստնությունը պիտի լինի այն, որ այդ մրցակցությունում գտնենք մեր տեղը»:
Տաթև ՀԱՐՈՒԹՅՈՒՆՅԱՆ
