«Սյունիքի դեպքերը նախորդող իրադարձությունների համատեքստում պետք է դիտարկել։ 2018թ․-ից ատելության խոսքը դարձել էր նորմա։ Իշխանությունը, որը պատասխանատու էր այս մթնոլորտի համար, չէր կանխում դա։ Ավելին՝ խրախուսում էր, իրեն հաճելի էր, որ իր հակառակորդներին վիրավորում եւ հայհոյում են հանրության որոշակի խմբեր։ Եվ սա վերադառնալու էր, փոխադարձության սկզբունք է»,-Aravot.am-ի եւ A1plus-ի հետ ճեպազրույցում այսօր անդրադառնալով Սյունիքում վարչապետ Նիկոլ Փաշինյանի դեմ ուղղված ցույցերին եւ դրանց հաջորդած ձերբակալություններին՝ ասաց ՀՀ փաստաբանների պալատի նախագահ Արա Զոհրաբյանը։
Նա շեշտեց, թե ինչ հոգեվիճակ ունեն սյունեցիները․ «Պատերազմից հետո ֆորսմաժորային վիճակում ենք։ Սյունեցիների՝ վտանգված լինելն ակնհայտ է։ Մանավանդ, խոսակցություն կա, որ Սյունիքի հետ կապված ինչ-որ զիջումներ են լինելու։ Որոտանի հատվածն արդեն իսկ զիջվեց Ադրբեջանին խայտառակ պայմաններում։ Բնական է սյունեցիների դժգոհությունը։ Վարչապետը գիտեր, որ իրեն ուրախ չեն Սյունիքում։ Մի անգամ գնացել էր, ճանապարհը փակել էին։ Եթե երկրորդ անգամ է գնում, հրահրում է մարդկանց զայրույթը։ Կողմնակից չեմ վիրավորանքի եւ ատելության խոսքի, բայց իշխանությունն է այդ լեզուն սովորեցրել մարդկանց»։
Արա Զոհրաբյանը նաեւ դատապարտեց սյունեցիների հանդեպ բերման ենթարկելու գործընթացում արձանագրված ստորացուցիչ, նվաստացուցիչ վերաբերմունքն իրավապահների կողմից։
Կարդացեք նաև
Լուիզա ՍՈՒՔԻԱՍՅԱՆ
