ՀՀԿ փոխնախագահ Արմեն Աշոտյանը Aravot.am-ի հետ զրույցում խոսելով ընդդիմության գործելաոճի արդյունավետության մասին, որը վարչակազմի հեռացումը տեսնում է սահմանադրական եղանակով` ասաց. «Երբ դեկտեմբերի վերջին ես զորացրվեցի ու եկա Երեւան, իմ առաջին իսկ շփումները լրատվամիջոցների հետ նրա մասին էին, որ քանի որ սրա պաշտոնավարումը հարված է Հայաստանի պետականությանը, իսկ Սահմանադրությունը ստեղծված է պետականության պահպանման համար, ոչ ֆիզիկական բռնությամբ, բայց ցանկացած քայլ, որը ուղղված է լինելու Սահմանադրությունը եւ պետությունը պահպանելուն, ինձ համար սահմանադրական է: Որովհետեւ Սահմանադրությունը ունի ոչ միայն տառեր, նախադասություններ եւ հոդվածներ, այլեւ ունի ոգի: Ու այդ ոգին այն մասին է, որ պետք է պետություն լինի, որ սահմանադրություն լինի:
Բժշկական մի հին անեկդոտ կա, երբ բուժքույրը բժշկին ասում է, թե հիվանդը մահացավ: Եվ երբ բժիշկը տեղեկանում է, որ հիվանդը մահանալուց առաջ քրտնել է, ասում է՝ ուրեմն բուժումը ճիշտ էր նշանակված: Ո՞ւմ է պետք պետության այն մահը, որը ըստ Սահմանադրության տառի է լինելու: Պետք է պետության կյանք՝ Սահմանադրության ոգով»:
Աշոտ ՀԱԿՈԲՅԱՆ
