Մեղրիի համայնքապետ Մխիթար Զաքարյանն այս պահին ՀՀ քննչական կոմիտեի շենքում է, աջակիցներն էլ շենքի դիմաց են։ Հիշեցնենք, որ վարչապետ Նիկոլ Փաշինյանի՝ Սյունիք կատարած երեկվա այցից հետո իրավապահները բերման են ենթարկում կամ հարցաքննության կանչում Սյունիքի մի շարք համայնքապետերի եւ քաղաքացիների։ Իշխանամետները երեկվանից լուրեր են տարածում, թե Մխիթար Զաքարյանը Նիկոլ Փաշինյանի դեմ ցույցերի կազմակերպիչներից է։ Սյունիքի նախկին մարզպետ Վահե Հակոբյանի փոխանցմամբ՝ Մխիթար Զաքարյանին ՔԿ-ում ձերբակալելու են։ Դուրս գալով ՔԿ շենքից՝ «Բարգավաճ Հայաստանի» պատգամավորներ Շաքե Իսայանն ու Արման Աբովյանը լրագրողներին հայտնեցին, որ 16 բերման ենթարկված կա, այդ թվում՝ Մեղրիի եւ Գորիսի փոխքաղաքապետերը եւ նույն քաղաքապետարանների կոմունալ բաժինների պետերը։
«Հաշվի առնելով հարցի նրբությունը՝ անունները չհրապարակենք։ Ընդ որում, մեկ բերման ենթարկվածի առնչությամբ կա տեղեկություն, որ իր խոսքով՝ բռնություն են կիրառել իր հանդեպ եւ դա տեսագրել են։ Քննությունը կպարզի։ Գրեթե բոլորը կասկածյալի կարգավիճակով մեղադրվում են խուլիգանություն կատարելու համար։ Բերման ենթարկվածներից մեկի մոտ էլ կորոնավիրուս է կասկածվում»,-նշեց Արման Աբովյանը։ Շահե Իսայանն էլ ասաց․ «Ոչ միայն Մեղրիի քաղաքապետին ձերբակալելու որոշում կա, այլեւ մյուսների հանդեպ՝ նույն խուլիգանության հոդվածով։ Տեղեկացանք, որ բերման ենթարկվածներից երկուսի հանդեպ անհամաչափ ուժ է կիրառվել»։
Լուիզա ՍՈՒՔԻԱՍՅԱՆ
