Ադրբեջանի ԱԳՆ խոսնակ Լեյլա Աբդուլլաևան արձագանքել է Հայաստանի ԱԳՆ իր գործընկեր Աննա Նաղդալյանի հայտարարությանը՝ Զանգեզուրի վերաբերյալ Իլհամ Ալիևի սպառնալիքների կապակցությամբ:
Աբդուլլաևան, մասնավորապես, նշել է, թե իբր Հայաստանը «եռակողմ հայտարարության կետերը կատարելու փոխարեն փորձում է խաբել միջազգային հանրությանը»:
Ըստ Աբդուլլաևայի՝ Ալիևն ասել է, որ եթե «եթե մենք հայտնաբերենք հնարավոր սպառնալիք, անհապաղ այն կչեզոքացնենք…, քանի որ դա ազգային պաշտպանության, ազգային անվտանգության հարց է»:
Նրա խոսքով այդ խոսքերը չեն սպառնում Հայաստանի տարածքային ամբողջականությանը, այլ նրա կողմից ցանկացած սպառնալիքի պատասխանելու վճռականության ցուցիչ են:
Կարդացեք նաև
«Ինչպես բազմիցս հայտարարել են ամենաբարձր մակարդակով, Ադրբեջանը պատրաստ է կարգավորել հարաբերությունները Հայաստանի հետ՝ միջազգային իրավունքի սկզբունքների, մասնավորապես ինքնիշխանության, տարածքային ամբողջականության և միջազգայնորեն ճանաչված սահմանների անձեռնմխելիության հիման վրա: 2020թ. նոյեմբերի 10-ին և 2021թ. հունվարի 11-ին ստորագրված եռակողմ հայտարարության իրականացումը ուղղված է հենց դրան: Ցավոք, այդ հայտարարությունների դրույթներն իրականացնելու փոխարեն Հայաստանը մոլորության մեջ է գցում իր ժողովրդին և փորձում է խաբել միջազգային հանրությանը»,- ասել է Աբդուլլաևան:
Պատրաստեց Վիկտորյա ԱՆԴՐԵԱՍՅԱՆԸ
