Երեկ՝ ապրիլի 20-ին, ուշ երեկոյան, ժամը 22-ի սահմաններում ՀՀ վարչապետ Նիկոլ Փաշինյանը մի քանի պատգամավորների հետ Շուռնուխից հասավ Կապան։ Սյունիքի մարզպետարանում նա հանդիպեց մարզային իշխանությունների հետ, մի 15 րոպե քայլեց Կապանով եւ մտավ հյուրանոց։
Ի դեպ, երեկ սահմանամերձ Կաղնուտ եւ Հանդ գյուղերում կառավարությունը մոտո–բլոկներ բաժանեց գյուղացիներին։ Կառավարության պատասխանատուները հորդորում էին լրագրողներին՝ նյութը հնարավորինս շուտ ներկայացնել, քանի որ վաղվա սպասվելիք իրադարձությունը «ծածկելու է շատ բան»։
Մինչեւ վարչապետի մուտքը Սյունիքի դարպասներ՝ նրա այցը տեղական չինովնիկները թաքցնում էին՝ նշելով, որ «տեղյակ չեն ոչ մի բանից»։
Ի դեպ, հիշեցնենք, որ ապրիլի 20-ի առավոտյան, ՀՀ ոստիկանապետի հրամաններով միանգամից աշխատանքից ազատվեցին ոստիկանության Սյունիքի մարզային վարչության պետը, պետի տեղակալը, Գորիսի, Կապանի, Սիսիանի ոստիկանության բաժինների պետերը։
Կարդացեք նաև
Ստացվում է այնպես, որ մարզային ոստիկանության պատասխանատուներին փոխելով, Սյունիքում ոչինչ չփոխվեց։ Վարչապետին արդեն երկրորդ անգամ չընդունեցին՝ մեղրեցիները պահանջեցին վարչապետից հեռանալ Մեղրիից։
Արմեն ԴԱՎԹՅԱՆ
